Como introducir a perspectiva de xénero na participación?

Compartimos con vos este interesante vídeo da Escola de participación cidadá do Concello de Narón e dinamizada pola cooperativa Rexenerando, no que reflexionamos sobre as boas prácticas para promover a participación das mulleres en distintos procesos participativos, dende a perspectiva de xénero.

A xornada contou coas achegas da cooperativa catalana Col·lectiu Punt6, que promove proxectos de participación no ámbito do urbanismo, e de Beatriz López Rey, da cooperativa Arabías, especialista na análise de políticas locais de xénero, na participación cidadá e en dereitos humanos.

Grazas por compartir algunhas claves!

Traballamos coas mulleres do mar da Mariña – Ortegal na construción da súa memoria e identidade colectiva

Neste proxecto promovido polo Grupo de Acción Local do sector Pesqueiro A Mariña – Ortegal no 2020 afondamos na memoria profesional dos colectivos de redeiras e mariscadoras a pé dos concellos de Cedeira, Cariño, Mañón (O Barqueiro) e Burela.

A través de reunións en pequenos grupos de mulleres, abordamos anécdotas da súa vida ligada ao mar, fitos importantes que marcaron momentos clave para a mellora dos seus dereitos profesionais, e mulleres referentes que abriron camiño. Con estas conversas e apoiándonos en documentos gráficos e obxectos, fomos construíndo unha identidade colectiva de ambas profesións no territorio, recoñecendo os avances acadados, e tamén os retos que redeiras e mariscadoras identifican nas súas profesións.

Agradecemos ás asociacións de redeiras e ás agrupacións de mariscadoras a súa xenerosidade compartindo tantas historias que merecen recoñecemento, e que coa súa experiencia profesional e a súa actitude seguen construíndo un sector pesqueiro máis igualitario.

Guía de modelos de xestión societaria en cooperativas, por EspazoCoop

Esta guía, elaborada pola Unión de Cooperativas Galegas EspazoCoop, é unha colección de distintos modelos para a xestión societaria en empresas cooperativas. Quere ser unha ferramenta que axude ás cooperativas a entender, documentar e formalizar distintos trámites de obrigado cumprimento e ten como obxectivo:
– Axudar na boa gobernanza da cooperativa.
– Axudar a comprender e aplicar as normas que regulan o funcionamento da cooperativa.
– Axudar na correcta realización de trámites e procesos documentais, establecidas na normativa vixente.

Cada situación de xestión societaria plantexada na guía conta con tres partes:
– Regulación: que di a normativa sobre ela?.
– Procedemento: cales son os pasos a dar?.
– Modelo de escritos ou documentos para unha correcta xestión da situación

Podes descargar a guía aquí.

Participamos no II encontro dO Globo, un espazo para a promoción da cidadanía global, iniciativa da ONGD Solidariedade Internacional de Galicia

O II Encontro do Globo reuniu virtualmente a 80 persoas, que se atoparon nun espazo común no que compartir micro – experiencias de transformación social moi diversas.

Neste encontro houbo de todo: unha benvida motivadora, palabras e experiencias dende o outro lado do mundo, música, arte en directo, e tamén unha feira de micro – experiencias de transformación social. Viaxando polo ciber espazo, puidemos achegarnos a distintas iniciativas que se están desenvolvendo na nosa contorna, seguindo os Obxectivos de Desenvolvemento Sostible.

Mirade o vídeo resumo do II Encontro do Globo!

 

 

Cidadania deséxavos boas festas!

Dende o equipo de Cidadania desexamos que pasedes un bo Nadal e que no vindeiro ano poidamos compartir espazos como facíamos antes: coas caras descubertas e con moita alegría.

Mandamos unha aperta (virtual) a todas as persoas coas que nos cruzamos polo camiño ao longo deste ano tan estraño, para comezar 2021 con forzas renovadas!

Estudo Xénero e investigación científica na Universidade de Vigo en tempos de COVID-19

En colaboración coa Unidade de Igualdade da Universidade de Vigo, Cidadania participou nesta investigación co obxectivo de coñecer o impacto que está a ter a actual situación sanitaria nas carreiras profesionais do Persoal Docente e Investigador (PDI) da Universidade de Vigo. Unha diagnose na que se constata a diminución da actividade investigadora entre as mulleres académicas evidenciando un escenario de desigualdades e acentuando aínda máis a brecha de xénero.
Neste enlace podes acceder á información do estudo e ao documento que se acaba de publicar.

Rias sostibles: boas prácticas no sector pesqueiro para o coidado do medio mariño e a redución do lixo

Hoxe compartimos con vos o proxecto Rías Sostibles, que se está a desenvolver na ría de Muros – Noia dende hai uns meses.

O seu obxectivo principal é consolidar prácticas profesionais sostibles na actividade pesqueira para a eliminación do lixo mariño e a valorización do produto pesqueiro.

Para isto, tentamos, dende Cidadanía, reforzar a colaboración entre o sector pesqueiro e entidades ecoloxistas. Desta maneira, fomentamos a concienciación e sensibilización para a protección e recuperación da biodiversidade e dos ecosistemas mariños.

O proxecto consta de dúas partes principais: a formación ás persoas do sector pesqueiro para a súa sensibilización ambiental e a identificación de prácticas sostibles no desenvolvemento do seu traballo; e a elaboración conxunta dun protocolo de boas prácticas ambientais. Podedes coñecer mais en profundidade o proxecto visualizando o seguinte vídeo.

Consume Dentro e ensancha a alma da Economía Solidaria

REAS Red de Redes e a Comisión do mercado Social lanzan unha nova campaña para fomentar o consumo de todas as persoas do circuíto da Economía Solidaria. Para isto, crearon esta web na que podes rexistrar os teus consumos habituais, así como mirar ofertas doutras entidades.

¿Qué pasaría se a Economía Solidaria consumira dentro da Economía Solidaria? Mirade o vídeo!

Participamos no Encontro de entidades da economía social e do terceiro sector, organizado por REAS Galicia

Esta semana, Reas Galicia organizou un encontro en liña no que poñer en común ás entidades galegas de economía social, con ONGDs e entidades do terceiro sector, achegando actividades, produtos e servizos nos que están implicadas as entidades da economía social galega.

Este é o enlace á grabación da xuntanza, no que podedes ver a diversidade de entidades e persoas que participaron deste encontro, e a forza de economía social galega.

Esta semana celebramos o Encontro de conclusións do proxecto de igualdade no mar, promovido polo Grupo de Acción Local do Sector Pesqueiro Ría de Arousa

A xornada contou coa benvida institucional da presidenta do GALP e patroa maior de Vilanova de Arousa, así como coa Concelleira de Igualdade do Concello de Boiro, e a intervención de Rosa Quintana, Conselleira do Mar. As conclusións e aprendizaxes ao longo destes meses foron compartidas polas propias mulleres participantes no proxecto, que tomaron a palabra no auditorio de Cabo de Cruz e foron as protagonistas do encontro. Falaron en público, proxectaron as vídeo – entrevistas previamente gravadas por elas mesmas, e fixeron preguntas e compartiron reflexións dende o público.   

O proxecto, que desenvolvemos dende Cidadanía como asistencia técnica, consistiu en tres partes: formativa (ferramentas para organizar e dinamizar reunións e xuntanzas en liña; liderado e estratexias para falar en público), informativa (organizamos xuntanzas con persoas expertas na saúde laboral das mulleres do mar, e en dereitos das profesionais do mar); e o propio encontro de conclusións, no que o obxectivo principal era que as mulleres tomasen a palabra e continúen gañando visibilidade.