Acompañamos ao Centro de Investigacións Mariñas na promoción da igualdade

|

O 17 de marzo tivo lugar, na Universidade de Vigo, unha xornada organizada pola comisión de igualdade do Centro de Investigacións Mariñas, na que abordar a promoción da igualdade na ciencia. A xornada arrancaba coa poñencia de Capitolina Díaz, catedrática de Socioloxía, especializada en Socioloxía da Educación e Socioloxía do Xénero, que enmarcou a promoción da igualdade na ciencia no programa Horizonte Europa. O discurso centrouse en tres áreas temáticas: a igualdade como imperativo legal e normativa á que se teñen que acoller as universidades, a introdución da perspectiva de xénero nas investigacións; e a promoción dunha cultura institucional sensible ao xénero. Despois, Águeda Gómez, directora da Unidade de Igualdade da Universidade de Vigo, compartiu coas persoas asistentes as accións que está desenvolvendo a UVigo na promoción da igualdade.

A segunda parte da xornada consistíu na xeración de grupos de traballo arredor de tres temáticas: traxectoria profesional, maternidades e paternidades, e participación e toma de decisións. Ao final da xornada obtivemos unha folla de ruta compartida para que o Centro de Investigacións Mariñas siga camiñando cara a promoción da igualdade.

Obradoiros de igualdade no IES Cacheiras

|

Este mes achegámonos ao IES Cacheiras, xunto co CIM de Teo, para poder reflexionar coa rapazada sobre aspectos relacionados coa igualdade de xénero. A través de obradoiros nas aulas, analizamos como pensamos que eran as mulleres e os homes hai un tempo, e como nos percibimos na actualidade, para debater e reflexionar sobre aqueles cambios que percibimos en canto á igualdade entre homes e mulleres. Os temas dos que falamos en grupo xiraron entorno á propia identidade, os estereotipos e os mandatos de xénero, os desexos e perspectivas de vida, a relación entre iguais, o respecto ás distintas orientacións e identidades sexuais, as redes sociais, os e ás súas referentes, e os coidados, entre outros temas que eles e elas propuñan como inquedanzas. Neste sentido, agradecemos aos mozos e ás mozas a súa apertura e confianza á hora de compartir con nós e traballar en grupo aqueles aspectos do seu interese.

O obxectivo destes obradoiros foi o de debater en grupo cuestións que foron cambiando ao longo do tempo e afondando na igualdade, así como identificar aqueles aspectos nos que actualmente percibimos desigualdades, xerando pensamento crítico e ser quen de construírnos como persoas coa maior liberdade, apoiándonos no grupo de iguais como motor de cambio.