Entradas

Nove mares: os Camiños do mar e os seus Oficios nos espazos xeradores de cultura

|

O mar é un potente motor económico, social e cultural. Na Costa da Morte a tripulación dos Nove Mares continúa reunindo iniciativas de economía azul de dentro e fora do territorio, divisando propostas replicables na zona costeira. As romarías do mar e os deportes do mar deron paso, nos meses de abril e maio, aos camiños do mar e aos oficios. Estas foron as temáticas de referencia baixo as que se organizaron os Espazos Xeradores de Cultura, onde abordamos o potencial de diversas iniciativas como elementos da economía azul sostible no territorio.

 

Camiños do mar

A Ruta dos Faros é un exemplo de como trazar unha ruta natural, singular e con contidos, que explica o territorio á vez que o constrúe. Na mesma xornada contamos tamén coa experiencia dos Concellos do Camiño Inglés, e as rutas do Xeoparque Cabo Ortegal. Os espazos de participación arredor dos camiños do mar permitiron reflexionar e coñecer actividades e iniciativas complementarias aos propios trazados, como a recuperación da toponimia local, a educación ambiental ou a ornitoloxía.

 

Oficios do mar

A carpintería de ribeira levounos ata o estaleiro O Baladiño, espazo singular que transmite a cultura do mar a través deste oficio tradicional. Nun novo Espazo Xerador de Cultura coñecemos iniciativas de turismo mariñeiro promovidas conxuntamente entre entidades locais e mariscadoras, no Concello da Pobra do Camariñal, a restauración do estaleiro San Ciprián de Outes convertido en espazo museístico, e a importancia do traballo das mulleres do mar, pioneiras en moitas ocasións da diversificación da actividade produtiva a través da economía azul. Coñecimos, tamén, as liñas mestras do Plan de Cultura Marítima da man do seu coordinador, Oscar Fuertes.

A singradura continúa coa Despensa do Mar e as Artes do Mar. Se non queres perderte nada, ségue a Nove Mares nas redes sociais e na súa páxina web!

 

Conclue o proceso de Orzamentos Participativos de Xuventude

|

A semana pasada presentáronse públicamente os resultados dos orzamentos participativos, un proceso promovido pola Concellería de Xuventude do Concello de Santiago.

A fase de propostas deu paso á de votación, no que as mozas e mozos compostelás priorizaron aquelas actividades máis interesantes, de entre as máis de 100 propostas presentadas en eidos tan variados como  Festivais de música e algo máis; Arte urbano e expresións artísticas; Culturas; Cine; Ciencia, Coñecemento, saberes; emprendemento; Ecoloxía e sostibilidade; Economía circular; Gastronomía saudable; eMocidade; Práctica deportiva; Igualdade, diversidade e educación sexual; Inclusión; Saúde; e Dereitos dos animais.

O proceso de votación, no que participaron máis de 1.000 rapaces e rapazas, deu como resultado a priorización dun ciclo de cine ao aire libre, onde o público escollerá as películas a proxectar; a celebración dun concerto dun grupo ou artista referente da escena musical actual; e un festival de música urbana con artistas emerxentes; así como unha feira para a adopción de animais.

Desenvolveranse, ata completar 100.000€ de orzamento municipal reservado a Orzamentos Participativos, as seguintes propostas máis votadas, que están vencelladas á música (festival de distintos xéneros musicais, apoio a artistas emerxentes, e cultura tradicional galega-foliadas), un programa de voluntariado para o coidado de animais, cursos de primeiros auxilios dirixidos á mocidade e charlas divulgativas relacionadas coa saúde mental.

 

 

 

 

Preséntase a diagnose da fenda salarial na USC

|

A Oficina de Igualdade de xénero da USC, baixo a coordinación do Centro Interdisciplinario de Investigacións e Estudos de Xénero (CIFEX) desenvolveu durante o ano 2023 unha diagnose sobre a fenda salarial e os atrancos na carreira das profesoras e investigadoras desta Universidade.

A metodoloxía do estudo abrangueu a análise de datos primarios e a realización de entrevistas grupais, onde se afondou nas causas xeradoras das asimetrías salariais, entre as que se atopan aspectos relacionados coa situación familiar e de coidados das investigadoras e docentes, pero tamén as inercias do sistema universitario. O informe pode consultarse no seguinte enlace.

 

Conclusións

Como idea central pódese afirmar que hai diferenzas de xénero entre os colectivos de mulleres e homes PDI da USC. Os datos amosan diferenzas a nivel de representación nas categorías profesionais e na consolidación en postos de maior recoñecemento, pero tamén a nivel de participación dentro dos espazos e toma de decisión, o que ten efectos directos no recoñecemento de méritos e nas retribucións percibidas.

 

Observatorio de Igualdade da UVigo: informe 2023

|

A Unidade de Igualdade da Universidade de Vigo elabora, con periodicidade anual, o Observatorio de Igualdade, un documento co propósito de analizar información cuantitativa que determine o grao de igualdade ou desigualdade existente na comunidade universitaria e a súa evolución.

Tomáronse como eixos de análise os tres sectores que constitúen a comunidade universitaria: persoal docente e investigador, persoal de administración e servizos e alumnado. Abordáronse datos relativos á presenza das mulleres e dos homes nos órganos representación e de xestión, a situación do persoal docente investigador e a situación profesional do persoal de administración e xestión. En canto ao alumnado, analízanse os distintos niveis educativos, a presenza nas áreas de coñecemento e a taxa de éxito e abandono.

O informe Observatorio da Igualdade permite coñecer e analizar a información do portal de transparencia da UVigo dende a perspectiva de xénero, adoptando políticas que melloren a participación das mulleres na comunidade universitaria e que equilibren as oportunidades de facer efectiva a súa carreira profesional e formativa.

Preséntase o mapa das mulleres da pesca da provincia da Coruña

|

A pasada fin de semana a Asociación Nacional de Mujeres de la Pesca (ANMUPESCA) presentou o mapa das mulleres da pesca na provincia da Coruña, un proxecto financiado pola Deputación da Coruña co obxectivo de dimensionar aos distintos colectivos profseionais e poñer en valor a contribución das mulleres á cadea de valor na pesca.

A xornada comezaba coa benvida de Elma Saiz, Ministra de inclusión, Seguridad Social y migraciones, e de Valentín González Formoso, presidente da Deputación da Coruña. Rita Miguez de la Iglesia, presidenta de ANMUPESCA, destacou a necesidade de apoiar ao sector pesqueiro, e en especial ás profesionais do marisqueo a pé, debido á situación de cese de actividade dende o último trimestre de 2023.

A elaboración do mapa requiriu labores de investigación e traballo de campo. Poden consultarse os datos da presenza das mulleres da pesca, da transformación de produto pesqueiro e da súa comercialización a través das capas seleccionables do mapa, así como as fotografías tomadas durante o traballo de campo e cedidas polas profesionais e as confrarías de pescadores. Ademais, pode consultarse a presenza no territorio das redeiras e o asociacionismo das mulleres do mar, dada a súa especial relevancia na provincia da Coruña.


Conclusións
A información analizada abarca a máis de 6.000 mulleres na cadea de valor da pesca, cun predominio importante da industria conserveira, que ocupa a máis de 3.200 traballadoras. Xunto ao marisqueo a pé (809 mulleres) e o comercio maiorista de produtos pesqueiro (623 mulleres), son as actividades profesionais con maior presenza das mulleres.

Así mesmo, cabe sinalar a segregación ocupacional por sexo nalgúns sectores profesionais: aqueles feminizados (as redeiras é un colectivo formado por 94,5% de mulleres), mentres que na pesca, o marisqueo a flote e a captura do percebe a presenza das mulleres non supera o 20%.

Elas deciden: Corpo, territorio e paz

|

Asamblea de Cooperación pola Paz Galicia é unha ONGD sen ánimo de lucro, laica e independente, que desenvolve proxectos arredor da cooperación ao desenvolvemento, a acción humanitaria, a intervención social e a economía social e solidaria. Na súa estratexia global sitúase o apoderamento das mulleres do Sur e Norte global.

Dende o 2019, ACPP desenvolve o proxecto “Elas Deciden: promover a equidade de xénero facilitando espazos de reflexión crítica e aprendizaxes significativas para imaxinar e construír colectivamente alternativas de xustiza social.” En edicións anteriores Elas Deciden xirou arredor dos dereitos reprodutivos e o artivismo feminista, para dar un salto cualitativo neste 2024. Elas Deciden constrúese entorno aos conceptos de Corpo, Territorio e Paz.

Durante o proxecto haberá espazos de intercambio de experiencias e coñecementos, promoción de aprendizaxes mutuas e unión de forzas cara a obxectivos comúns das mulleres da pesca. Dende Cidadania, ademais, encargarémonos da elaboración dunha exposición fotográfica de mulleres do mar, que complemente á exposición das mulleres da pesca artesanal do Salvador.

 

 

Arrancan os orzamentos participativos da mocidade de Compostela

|

De cara a 2024, acompañamos ao Departamento de Xuventude do Concello de Santiago no proceso de Orzamentos Participativos. A mocidade compostelá entre 16 e 30 anos que residan, estuden ou traballen en Santiago de Compostela decidirán o destino de 100.000 € para a programación de actividades que se desenvolverán ao longo do ano que vén.

Os orzamentos participativos contarán con dúas fases fundamentais: a presentación de propostas e a votación a través de medios telemáticos. A fase de presentación de propostas combinará a modalidade presencial e en liña, para o que comezamos a achegarnos aos institutos compostelás para informar sobre o inicio do proceso e desenvolver obradoiros de reflexión conxunta e presentación de propostas. As temáticas das propostas xiran arredor do lecer, o medio ambiente, a igualdade, a inclusión, a cultura ou o voluntariado.

 

Constitúese a Asociación das IXP dos viños de Galicia

|

O proxecto de cooperación das Indicacións Xeográficas Protexidas dos viños de Galicia, promovido polos Grupos de Desenvolvemento Rural galegos, culmina coa constitución da Asociación das IXP dos viños de Galicia. Adegueiras e adegueiros das IXP do Val do Miño – Ourense, Terras de Barbanza-Iria, Terra de Betanzos, Ribeiras do Morrazo e Terras de Navia, reuníronse a finais de novembro para asinar a acta fundacional.

Entre os seus fins destaca a potenciación e promoción do desenvolvemento e coñecemento das IXP dos viños de Galicia, fomentando o recoñecemento das mesmas. A asociación tamén ten como obxectivo principal o de representar e defender colectivamente os dereitos, intereses e accións das e dos socios no ámbito social, económico, profesional, ou calquera outro relacionado coa viticultura.

Ao longo do proxecto de cooperación desenvolvéronse as xornadas dos Túnel dos Viños a nivel provincial. Estes encontros constaron dunha Masterclass e unha cata dos viños que conformar as IXP galegas. Bótalle un ollo ao acontencido no túnel de Ourense, Lugo, Vigo e A Coruña.

Acompañamos aos GALP galegos na difusión do período FEMPA

|

A Consellería do Mar publicou recentemente a convocatoria de axudas para proxectos ao abeiro das estratexias de desenvolvemento local participativo (EDLP), aprobadas aos grupos de acción local do sector pesqueiro (GALP) no marco do Fondo Europeo Marítimo, de Pesca e de Acuicultura 2021-2027.

Estas semanas acompañamos ao GALP Ría de Arousa nun Encontro Informativo que reuníu ás confrarías, concellos e asociacións da zona costeira. A xerencia do Grupo compartíu información de relevancia sobre a orde de axudas, e desenvolveuse unha Mesa Redonda con mulleres promotoras de proxectos financiados polo GALP: Cordelería R de Lorenzo, Algas La Patrona e Atando aparellos. Este evento enmarcouse no programa O Sal do Mar.

Ademais, percorremos a Costa Ártabra acompañando ao GALP Golfo Ártabro Norte. “Pescamos ideas” é a campaña de divulgación do programa de axudas do FEMPA, que pretende dinamizar ao sector pesqueiro e ao conxunto das entidades locais na promoción de proxectos. Durante o mes de novembro desenvolveranse, todas as semanas, xornadas locais de divulgación do FEMPA nesta zona costeira.

Acompañamos tamén ao GALP Costa Sostible na difusión do programa de axudas entre a poboación da Ría Muros – Noia, a través do seu programa Horizonte 2027. O GALP Costa Sostible incide particularmente no desenvolvemento sustentable do territorio. A través da visibilización de exemplos de éxito desenvoltos ao abeiro dos fondos FEMP, as persoas promotoras trasladan a súa experiencia a aquelas entidades con interese en emprender co apoio do GALP. Neste caso contouse coa experiencia de economía colaborativa Daqui Darredor, e o proxecto de turismo Mariñeiro por un día.

O prazo de presentación de proxectos finaliza o 26 de outubro. Para máis información, consulta a páxina web dos Grupos de Acción Local do Sector Pesqueiro.

Ciclo de Encontros Emprendedores da Axenda Urbana 2030 do Concello de Santiago

|

O Concello de Santiago, a través do CERSIA, desenvolveu o ciclo de Encontros Emprendedores, co obxectivo de difundir as liñas mestras da diagnose e o plan de acción da Axenda Urbana 2030. Estes encontros pretenden motivar o emprendemento de novas iniciativas mediante a posta en común de experiencias inspiradoras que xa están desenvolvendo a súa actividade empresarial no marco dos obxectivos de desenvolvemento sostible.

No verán contamos coa participación de Larlilás, asociación sen ánimo de lucro arredor da vivenda colaborativa na vellez. Este encontro xerou moito interese entre a cidadanía, e permitiunos repensar a vellez, o benestar e os coidados. Contamos ademais coa presenza de Iago Lestegás, Concelleiro de urbanismo, vivenda e cidade histórica, que compartiu algunhas claves sobre a vivenda e a calidade de vida no centro urbán.

Setembro foi o mes no que abordamos a temática Era Dixital, cristalizada en proxectos que empregan os medios telemáticos como unha parte importante o seu desenvolvemento. O Encontro Emprendedor reuniunos no espazo Creativas Galegas, arredor do proxecto El Camino ESS promovido por REAS Galicia. Esta iniciativa tece unha rede de proxectos de economía social e solidaria arredor do turismo alternativo, xerando un impacto positivo para o territorio e as persoas que habitan nel.

Esta semana celebramos o 9º Encontro Emprendedor, arredor do eixo temático Gobernanza. Coop57 Galiza, entidade referente e consolidada no territorio, achegounos ao seu funcionamento interno baixo os piares da participación, da democracia interna e da auto – organización. Ademais, puidemos aprender da súa actividade principal como instrumento financeiro ao servizo de proxectos transformadores no marco da economía social.

Se aínda non participaches, aínda estás a tempo! O último Encontro Emprendedor terá lugar no mes de novembro. Podes obter máis información sobre a Axenda Urbana 2030 na páxina web do Concello de Santiago.