Entradas

Continúan os Encontros Emprendedores no marco da Axenda Urbana 2030 do Concello de Santiago

|

Ao longo do 2023, a través do CERSIA, estamos a desenvolver Encontros Emprendedores para difundir as liñas mestras da diagnose e o plan de acción da Axenda Urbana 2030. Estes encontros pretenden motivar o emprendemento de novas iniciativas mediante o coñecemento de experiencias inspiradoras que xa están desenvolvendo a súa actividade empresarial no marco dos obxectivos de desenvolvemento sostible.

En maio abordábamos a Economía Circular como oportunidade para o emprendemento, enfocándonos no textil e na moda da man de Off connection. Puidemos intercambiar ideas arredor dun modelo de produción e consumo máis sostibles, con ciclos produtivos máis longos, reaproveitando materiais xa producidos en desuso, e xerando unha menor cantidade de residuos.

Xuño foi o mes no que abordamos a Igualdade de Oportunidades, traendo a Promove: proxectos e persoas como experiencia marco. Neste Encontro Emprendedor establecemos unha conversa arredor do emprendemento das mulleres en Compostela, identificando fortalezas e obstáculos na posta en marcha de iniciativas empresariais, e poñendo en valor a economía social como modelo. Abordáronse tamén os valores destes emprendementos, onde as persoas están no centro, e tamén a confianza mútua, os coidados e as lóxicas colaborativas.

Xa inmersas no verán, a Economía Urbana foi o eixo do 6º Encontro Emprendedor. Neste espazo contamos coa iniciativa de Abastos 2.0, vinculando a importancia da oferta gastronómica co produto local. Da man de Iago Pazos puidemos achegarnos a esta experiencia de cociña de mercado, no mercado, que nos deixou con ganas de seguir saboreando estes Encontros!

O vindeiro Encontro Emprendedor terá lugar o día 22 de agosto, abordando a temática da Vivenda. Podes informarte sobre as iniciativas arredor da Axenda Urbana 2030 premendo aqui!

Presentado o estudo “Diagnose sociolaboral das redeiras de Galicia”

|

A semana pasada achegámonos á Lonxa de Malpica de Bergantiños para compartir as principais conclusións e resultados acadados no Diagnóstico sociolaboral das redeiras de Galicia, unha investigación desenvolta no 2022 e promovida polo Peirao, Federación galega de redeiras artesás.

Os obxectivos desta diagnose centráronse na delimitación do colectivo, que conta con 375 profesionais en Galicia, sendo o 91% mulleres. Ademáis, 3 de cada 4 redeiras no Estado son galegas, o que dá conta do liderado das redeiras galegas nos avances sociolaborais do colectivo. Así mesmo, desenvolveuse unha enquisa que contou cunha ampla participación, o que permitiu acadar unha imaxe realista das condicións sociolaborais do colectivo. Por último, realizamos grupos de análise e proposta para reflexionar sobre o futuro desta profesión, nos que participaron arredor de 100 redeiras.

A xornada de presentación continuou coa visita á exposición “Redeiras, unha profesión con historia”. Pode consultarse o documento aquí.

Acompañamos ás entidades locais no reforzo da coordinación contra as violencias machistas

|

Ao longo do 2023 continuaremos traballando con distintos concellos galegos na posta en marcha das Mesas de coordinación inter – institucional contra a violencia de xénero. Ademais, reforzaremos as dinámicas de Mesas xa constituídas que precisen dun impulso para mellorar o seu funcionamento, definindo estratexias para salvar obstáculos aos que se enfrontan estes espazos e detectando posibles necesidades dos ámbitos participantes.

Esta formación, ofertada por parte da Secretaría Xeral da Igualdade, pretende apoiar aos Concellos galegos na coordinación e atención ás mulleres en situación de violencia, xerando un espazo no que os Centros de Información ás mulleres (CIM) e servizos sociais, centros de saúde, forzas e corpos de seguridade do Estado, persoal político e o ámbito xudicial poidan compartir información para mellorar a atención ás mulleres en situación de violencia machista.