Entradas

Agareso celebra un encontro entre centros educativos no marco do EpDLab

|

Esta semana, o Auditorio de Bandeira en Silleda acolleu un encontro intercentros dentro do Laboratorio de Educación para o Desenvolvemento EpDLab. Este proxecto, coordinado por Agareso, cumpre 10 anos neste curso. O proxecto EdDLab diríxese a mellorar as habilidades de reflexión crítica e participación social do alumnado e do profesorado da ESO de cinco IES de Galicia, nas localidades de Boiro, Bueu, Viana, Brión e Silleda.

A longo do curso escolar a comunidade educativa que participa no EpDLab realiza un traballo de reflexión ao respecto das desigualdades e os elementos xeradores da pobreza e inxustizas desde as ferramentas da comunicación e traballando as competencias dixitais. No encontro mocidade e profesorado compartiron as súas aprendizaxes e intercambiaron ideas que abordaron nos obradoiros realizados nos centros de ensino nos meses anteriores. Cidadania desenvolve nesta edición os traballos relacionados coa avaliación externa do proxecto.

Na sesión houbo tempo tamén para coñecerse mellor e compartir risas e ilusións. Arredor de 100 alumnas e alumnos, co acompañamento de 11 profes, traballaron arredor dos 5 grandes temas escollidos polos propios grupos a comezos de curso:  Saúde mental e benestar, Medio ambiente, Activismo e cambio social, Dereito á educación e Convivencia e bo trato.

 

Indagamos en experiencias de liderados xuvenís transformadores

|

Solidariedade Internacional de Galicia promove o proxecto Liderados Xuvenís Transformadores, onde indagamos sobre experiencias de activismo promovidas pola mocidade galega. Xunto co grupo de investigación da Universidade da Coruña ECIGAL, achegámonos ás motivacións e prácticas desenvoltas por rapazas e rapaces ao longo da xeografía galega.

Co obxectivo de xerar coñecemento sobre a participación e os activismos xuvenís, achegámonos ás iniciativas para coñecer a súa “historia de vida”: abordando os fitos, as alianzas, as accións e reflexións, a as motivacións transformadoras, construímos unha reflexión colectiva sobre o sentido das experiencias da mocidade.

Comezamos en Vigo co Comando Igualdade, unha experiencia que nace no IES Alexandre Bóveda pola curiosidade dun grupo de rapazas para achegarse ao feminismo e rachar co patriarcado dende as aulas. Unha iniciativa que trascendeu do barrio de Coia a outros colexios e institutos, e que recolle a súa andaina nesta publicación.

En Lugo compartimos unha conversa ben interesante con AVANTE LGTB+, un grupo que reactivou a manifestación no día do orgullo, e que organizan actividades de sensibilización e ocio dunha maneira autoxestionada.

En Noia puidemos coñecer a iniciativa Voga Voga, que forma parte da Aula Sostible do Freixo, onde mozos e mozas organizan recollidas de lixo plástico nos areais, que despois transforman en obxectos útiles como agullas para as redeiras, mosquetóns para as mariscadoras a pé, chaveiros, e moitas cousas máis!

En Vilar de Santos están as Xingras da Arca, un grupo de nenas e rapazas que tocan a pandeireta e cantan, ademais de organizarse para fortalecer o uso da lingua galega e da cultura do rural galego. Ademais de participar en actuacións ao longo de Galicia onde comparten as súas cancións, tamén recuperan cancións tradicionais da veciñanza, mantendo viva a lingua.

 

Conclue o proceso de Orzamentos Participativos de Xuventude

|

A semana pasada presentáronse públicamente os resultados dos orzamentos participativos, un proceso promovido pola Concellería de Xuventude do Concello de Santiago.

A fase de propostas deu paso á de votación, no que as mozas e mozos compostelás priorizaron aquelas actividades máis interesantes, de entre as máis de 100 propostas presentadas en eidos tan variados como  Festivais de música e algo máis; Arte urbano e expresións artísticas; Culturas; Cine; Ciencia, Coñecemento, saberes; emprendemento; Ecoloxía e sostibilidade; Economía circular; Gastronomía saudable; eMocidade; Práctica deportiva; Igualdade, diversidade e educación sexual; Inclusión; Saúde; e Dereitos dos animais.

O proceso de votación, no que participaron máis de 1.000 rapaces e rapazas, deu como resultado a priorización dun ciclo de cine ao aire libre, onde o público escollerá as películas a proxectar; a celebración dun concerto dun grupo ou artista referente da escena musical actual; e un festival de música urbana con artistas emerxentes; así como unha feira para a adopción de animais.

Desenvolveranse, ata completar 100.000€ de orzamento municipal reservado a Orzamentos Participativos, as seguintes propostas máis votadas, que están vencelladas á música (festival de distintos xéneros musicais, apoio a artistas emerxentes, e cultura tradicional galega-foliadas), un programa de voluntariado para o coidado de animais, cursos de primeiros auxilios dirixidos á mocidade e charlas divulgativas relacionadas coa saúde mental.

 

 

 

 

Arrancan os orzamentos participativos da mocidade de Compostela

|

De cara a 2024, acompañamos ao Departamento de Xuventude do Concello de Santiago no proceso de Orzamentos Participativos. A mocidade compostelá entre 16 e 30 anos que residan, estuden ou traballen en Santiago de Compostela decidirán o destino de 100.000 € para a programación de actividades que se desenvolverán ao longo do ano que vén.

Os orzamentos participativos contarán con dúas fases fundamentais: a presentación de propostas e a votación a través de medios telemáticos. A fase de presentación de propostas combinará a modalidade presencial e en liña, para o que comezamos a achegarnos aos institutos compostelás para informar sobre o inicio do proceso e desenvolver obradoiros de reflexión conxunta e presentación de propostas. As temáticas das propostas xiran arredor do lecer, o medio ambiente, a igualdade, a inclusión, a cultura ou o voluntariado.

 

Celebramos o IV Encontro de O Globo

|

A semana pasada tivo lugar o IV Encontro do Globo, unha iniciativa promovida por Solidariedade Internacional de Galicia. O Globo é unha ferramenta para a promoción da cidadanía global, que promove e recolle experiencias de transformación social. O Encontro tivo lugar en Santiago de Compostela, e contou coa participación de arredor de 100 persoas, que participaron de espazos comúns, obradoiros creativos, e conexións con entidades do Sur para coñecer as súas iniciativas. O momento principal do encontro foi a Feira de micro – experiencias de transformación social, onde as escolas e os colectivos amosaron ás persoas asistentes as súas iniciativas. O Globo continúa xirando!

Obradoiros de igualdade no IES Cacheiras

|

Este mes achegámonos ao IES Cacheiras, xunto co CIM de Teo, para poder reflexionar coa rapazada sobre aspectos relacionados coa igualdade de xénero. A través de obradoiros nas aulas, analizamos como pensamos que eran as mulleres e os homes hai un tempo, e como nos percibimos na actualidade, para debater e reflexionar sobre aqueles cambios que percibimos en canto á igualdade entre homes e mulleres. Os temas dos que falamos en grupo xiraron entorno á propia identidade, os estereotipos e os mandatos de xénero, os desexos e perspectivas de vida, a relación entre iguais, o respecto ás distintas orientacións e identidades sexuais, as redes sociais, os e ás súas referentes, e os coidados, entre outros temas que eles e elas propuñan como inquedanzas. Neste sentido, agradecemos aos mozos e ás mozas a súa apertura e confianza á hora de compartir con nós e traballar en grupo aqueles aspectos do seu interese.

O obxectivo destes obradoiros foi o de debater en grupo cuestións que foron cambiando ao longo do tempo e afondando na igualdade, así como identificar aqueles aspectos nos que actualmente percibimos desigualdades, xerando pensamento crítico e ser quen de construírnos como persoas coa maior liberdade, apoiándonos no grupo de iguais como motor de cambio.

III Encontro anual do Globo

|

O Globo é un proxecto promovido pola ONGd Solidariedade Internacional de Galicia, con quen colaboramos dende os inicios desta iniciativa colectiva, que ten como obxectivo promover a educación para a cidadanía global. Anualmente celebramos un encontro, no que poñemos en común as micro – experiencias de transformación social promovidas, e fomentamos a xeración de redes entre persoas implicadas polo cambio social e pola participación activa na sociedade. Queres saber o que aconteceu no III Encontro do Globo? Dentro vídeo!

Desenvolvemos un obradoiro para que os clubes e asociacións deportivas do Concello de Teo sexan espazos que favorecen a igualdade e o respecto

|

En colaboración co Centro de Información ás Mulleres do Concello de Teo, vimos de desenvolver un obradoiro no que promover a igualdade de xénero no deporte. Na xornada traballamos con representantes de clubes e asociacións deportivas de base, analizando as prácticas que desenvolven (no tipo de actividades que ofertan, a participación de mulleres nos espazos directivos, nos adestramentos ou o uso da linguaxe inclusiva nas comunicacións), e ofrecerlles ferramentas para poder transformar ás entidades en espazos máis inclusivos e igualitarios. No obradoiro participaron 15 entidades deportivas, que reflexionaron sobre o papel do deporte na promoción da igualdade.

Como participa a mocidade en Galicia?

|

Cal é o estado da participación da mocidade galega na actualidade? Cales son as barreiras e cales son os facilitadores para motivar ás persoas novas a participar? Ten cambiado o modelo de participación tradicional? Como se pode contribuír á promoción dunha cultura participativa con enfoque da Cidadanía Global entre a mocidade galega?

Estas son algunhas das preguntas nas que quere afondar Solidariedade Internacional de Galicia, que promove este estudo vinculado ao proxecto O Globo, sobre o que xa os falamos anteriormente.

Para achegarse ás claves da participación da mocidade galega, empregaranse diferentes fontes de información, como a revisión de bibliografía, a realización desta enquisa entre as persoas novas, e as achegas dun grupo motor. Se tes entre 14 e 30 anos, podes acceder á enquisa neste enlace:  https://cutt.ly/cbvJTiq .

Convidámosvos a difundilo entre a mocidade ao voso arredor! A enquisa estará dispoñible ata o 23 de maio!

Participamos no II encontro dO Globo, un espazo para a promoción da cidadanía global, iniciativa da ONGD Solidariedade Internacional de Galicia

|

O II Encontro do Globo reuniu virtualmente a 80 persoas, que se atoparon nun espazo común no que compartir micro – experiencias de transformación social moi diversas.

Neste encontro houbo de todo: unha benvida motivadora, palabras e experiencias dende o outro lado do mundo, música, arte en directo, e tamén unha feira de micro – experiencias de transformación social. Viaxando polo ciber espazo, puidemos achegarnos a distintas iniciativas que se están desenvolvendo na nosa contorna, seguindo os Obxectivos de Desenvolvemento Sostible.

Mirade o vídeo resumo do II Encontro do Globo!