Entradas

Xa podes consultar o mapa estatal de redes e grupos de participación cidadá

|

A Rede de innovación en procesos de participación (RIEPP) comparte o mapa de entidades e colectivos implicados na promoción da democracia participativa ao longo do Estado. O mapa sinala aquelas entidades de carácter social (sinaladas en morado), profesional (en verde), académico (azul) e Administración pública (laranxa). Se es unha entidade que pon en marcha procesos de participación social, animámoste a unirte á Rede, escribindo a redinnovacionparticipativa@gmail.com.

Ademáis, queremos poñer en valor as conclusións recollidas neste documento, sobre as Xornadas desenvoltas no mes de febreiro en Valencia, baixo o nome “Cara a democracia participativa: avaliar, comunicar, lexislar”.

Encontros emprendedores no marco da Axenda Urbana 2030 do Concello de Santiago

|

Ao longo do 2023, a través do CERSIA, estamos a desenvolver Encontros Emprendedores para difundir as liñas mestras da diagnose e o plan de acción da Axenda Urbana 2030. Estes encontros pretenden motivar o emprendemento de novas iniciativas mediante o coñecemento de experiencias inspiradoras que xa están desenvolvendo a súa actividade empresarial no marco dos obxectivos de desenvolvemento sostible.

O primeiro Encontro Emprendedor xirou arredor do eixo Territorio, Paisaxe e Biodiversidade, onde 7H Cooperativa Cultural puxo en común a súa experiencia xerando a cooperativa dende o seu inicio, e destacando algúns dos proxectos mais relevantes, en clave de intervención sobre a paisaxe en clave comunitaria.

O segundo Encontro Emprendedor formulouse como un debate coas persoas participantes sobre o Modelo de Cidade, contando coas experiencias marco de DeHistoria e Estudio MMASA. O espazo permitiu reflexionar, dende o movemento veciñal e comunitario, xunto coa perspectiva urbanística, como concibimos a cidade no futuro.

No terceiro Encontro Emprendedor abordamos a temática do Cambio Climático e Resiliencia, achegándonos á experiencia de Feitoría Verde como referente na educación ambiental. Puidemos, ademais, poñer en común accións que se deben promover a nivel local para paliar os impactos negativos desta crise global.

 O vindeiro Encontro Emprendedor terá lugar o día 16 de maio, e xirará entorno á Economía Circular. Podes inscribirte neste enlace.

 

 

Participamos nas Xornadas Internacionais de participación, investigación – acción e desenvolvemento comunitario

|

A Universidade do País Vasco e o grupo de investigación Parte Hartuz organiza, entre o 26 e 28 de abril, as Xornadas Internacionais de participación, investigación – acción e desenvolvemento comunitario, unha cita á que non queríamos falta dende Cidadanía.

A participación de poñencias referentes e os espazos de reflexión axudarán a identificar os retos actuais que presentan a participación social. O programa aborda temáticas como a innovación democrática, as aprendizaxes dende diversas experiencias de participación, a acción comunitaria e o arraigo territorial, ou a gobernanza.

Participar de xornadas inspiradoras impúlsanos a mellorar os procesos que acompañamos, ademáis de tecer redes máis alá do territorio.

 

Organizamos encontros emprendedores no marco da Axenda Urbana 2030 de Santiago de Compostela

|

O Concello de Santiago vén de desenvolver o proceso arredor da Axenda Urbana 2030, co obxectivo de trazar as liñas futuras municipais a través dunha diagnose, identificando os retos principais e debuxando un plan de acción para o territorio. Durante o 2023 acompañaremos ao Concello na difusión da Axenda Urbana 2030 e a súa documentación, en constante revisión.

Unha vez por mes organizamos un Encontro Emprendedor arredor dos eixos temáticos que estruturan a Axenda Urbana. Estes encontros emprendedores teñen o dobre obxectivo de difundir a Axenda Urbana 2030, así como o de poñer en valor aquelas iniciativas empresariais, cooperativas e asociativas no territorio que xa están a desenvolver a súa actividade arredor dos eixos recollidos na Axenda Urbana 2030.

 

Asistimos ao II Encontro da Red de Innovación en Procesos Participativos (RIEPP)

|

Cidadania viaxou ata Valencia ao II Encontro da Red de Innovación en Procesos Participativos (RIEPP) un espazo de traballo e encontro de entidades e colectivos de profesionais, para intercambiar ideas, proxectos e experiencias sobre los procesos participativos.

Participamos máis de 70 persoas procedentes de distintas comunidades autónomas e con perfís diversos (ámbito académico, administracións, profesionais, activistas, estudantes,…), pero co interese común por analizar e propoñer innovacións e melloras metodolóxicas nos actuais procesos de participación cidadá e social.

Unhas xornadas de interese onde aprender, compartir e encontrarse con xente amiga. Máis infomación na páxina web da Red de Innovación en Procesos Participativos.

Acompañamos aos GALP na elaboración das estratexias de desenvolvemento local participativo

|

Os Grupos de Acción Local do Sector Pesqueiro galegos atópanse no proceso de elaboración das Estratexias de Desenvolvemento Local Participativo para o período de programación 2023-2027 do Fondo Europeo Marítimo, da Pesca e da Acuicultura (FEMPA).

Durante o verán levaranse a cabo encontros presenciais e virtuais, nos que se perfilará unha diagnose sobre as necesidades de cada un dos territorios costeiros. A segunda fase deste proceso permitirá deseñar un Plan de acción en cada territorio, de forma participada entre o sector pesqueiro, público, social e económico.

As Estratexias de Desenvolvemento Local Participativo orientarán a aplicación do Fondo Europeo Marítimo e da Pesca e da Acuicultura (FEMPA) para o período de fondos europeos 2021-2027.

Para máis información sobre o proceso en cada territorio:

GALP A Mariña Ortegal

GALP Golfo Ártabro Norte

GALP Golfo Ártabro Sur

GALP Ría de Arousa

GALP Ría de Pontevedra

Celebramos o IV Encontro de O Globo

|

A semana pasada tivo lugar o IV Encontro do Globo, unha iniciativa promovida por Solidariedade Internacional de Galicia. O Globo é unha ferramenta para a promoción da cidadanía global, que promove e recolle experiencias de transformación social. O Encontro tivo lugar en Santiago de Compostela, e contou coa participación de arredor de 100 persoas, que participaron de espazos comúns, obradoiros creativos, e conexións con entidades do Sur para coñecer as súas iniciativas. O momento principal do encontro foi a Feira de micro – experiencias de transformación social, onde as escolas e os colectivos amosaron ás persoas asistentes as súas iniciativas. O Globo continúa xirando!

III Encontro anual do Globo

|

O Globo é un proxecto promovido pola ONGd Solidariedade Internacional de Galicia, con quen colaboramos dende os inicios desta iniciativa colectiva, que ten como obxectivo promover a educación para a cidadanía global. Anualmente celebramos un encontro, no que poñemos en común as micro – experiencias de transformación social promovidas, e fomentamos a xeración de redes entre persoas implicadas polo cambio social e pola participación activa na sociedade. Queres saber o que aconteceu no III Encontro do Globo? Dentro vídeo!

Como participa a mocidade en Galicia?

|

Cal é o estado da participación da mocidade galega na actualidade? Cales son as barreiras e cales son os facilitadores para motivar ás persoas novas a participar? Ten cambiado o modelo de participación tradicional? Como se pode contribuír á promoción dunha cultura participativa con enfoque da Cidadanía Global entre a mocidade galega?

Estas son algunhas das preguntas nas que quere afondar Solidariedade Internacional de Galicia, que promove este estudo vinculado ao proxecto O Globo, sobre o que xa os falamos anteriormente.

Para achegarse ás claves da participación da mocidade galega, empregaranse diferentes fontes de información, como a revisión de bibliografía, a realización desta enquisa entre as persoas novas, e as achegas dun grupo motor. Se tes entre 14 e 30 anos, podes acceder á enquisa neste enlace:  https://cutt.ly/cbvJTiq .

Convidámosvos a difundilo entre a mocidade ao voso arredor! A enquisa estará dispoñible ata o 23 de maio!

Como introducir a perspectiva de xénero na participación?

|

Compartimos con vos este interesante vídeo da Escola de participación cidadá do Concello de Narón e dinamizada pola cooperativa Rexenerando, no que reflexionamos sobre as boas prácticas para promover a participación das mulleres en distintos procesos participativos, dende a perspectiva de xénero.

A xornada contou coas achegas da cooperativa catalana Col·lectiu Punt6, que promove proxectos de participación no ámbito do urbanismo, e de Beatriz López Rey, da cooperativa Arabías, especialista na análise de políticas locais de xénero, na participación cidadá e en dereitos humanos.

Grazas por compartir algunhas claves!