O Concello de Burela promoveu O Espello do Faro, unha iniciativa arredor da posta en valor do patrimonio material e inmaterial pesqueiro da vila. O elemento central do proxecto foi o molde do faro, unha estrutura de grandes dimensións empregada para a reparación do Pena Burela, tras un temporal no ano 2014.

En paralelo á reparación do molde nos estaleiros, desenvolvéronse actividades para a recollida de patrimonio inmaterial pesqueiro a través de radio e fotografía, contando co apoio de Brais Lorenzo e Serxio Pascual, do colectivo Habitar o Baleiro. Nestes obradoiro xuntamos á rapazada do grupo de participación adolescente coa asociación A Moncloa, empregando radio e foto para sacar á luz vivencias do sector pesqueiro e intercambiar información entre xeracións.

A rapazada fixo fotografías, retratando os rostros do sector pesqueiro, e grabou audios de homes de mar xubilados e mariñeiros migrantes, de redeiras e de mulleres da conserva, que construíron e dan vida á historia e desenvolvemento local.

Xa no 2025, con contidos arredor da frota pesqueira, as lendas, o produto pesqueiro, os oficios, as festas mariñeiras, etc, e co molde do faro instalado na zona da Marosa, chegou o momento de fusionar as dúas pezas. A través do concurso MoldeArte, David Catá dirixiu e desenvolveu “La piel del mar”, unha obra que plasma a identidade mariñeira desta vila.

A cor azul, as redes en desuso e adaptadas pola man das redeiras Cabo Burela, unha peza de encaixe realizada pola Asociación As Encaixeiras de Burela, e uns xogos de luz e música transmiten o sentir de Burela cara o mar. Ademais, David Catá compuxo unha peza musical que acompaña á proposta artística.

 

O espello do faro conclúe coa inauguración da obra artística, converténdose nun elemento de referencia veciñal que transmite o vínculo de Burela co mar, funcionando como espello en terra do faro no mar.

Se queres saber máis, preme neste enlace para ver o vídeo do que aconteceu na inauguración! Inauguración molde do faro