Colaboración coa Rede CEDIM

|

Cidadania, xunto con Lilith, xestión social e educativa, vai deseñar o plan de dinamización dos centros CEDIM, co obxectivo de favorecer a innovación e a máxima eficiencia nas dinámicas de traballo dos centros, xestionados pola Secretaria Xeral da Igualdade.

A Rede Cedim é un proxecto transfronteirizo, Galicia-Norte de Portugal, financiado pola Unión Europea e que nace para prestar servizos de información e apoio ás mulleres rainas en materia de igualdade. A través de catro centros situados nas localidades galegas de Verín, A Cañiza, Tui e Vila Verde en Portugal, preténdese mellorar a situación das mulleres, potenciando a rede de centros a través de dinámicas colaborativas e a participación activa dos distintos axentes que interveñen no territorio.

Podedes consultar información sobre a Rede Cedim no seguinte enlace:

http://www.redecedim.eu

E-Cidadania en Google Summer of Code

|

En agosto finalizou a edición 2012 do Google Summer of Code. Como sabedes, o proxecto e-cidadania, a aplicación de código aberto para a participación cidadá, contou grazas a Google coa colaboración de catro estudantes e tres titores dos seguintes países: India, Macedonia, Francia, España, Brasil e Perú.

Os resultados do traballo foron moi tanxibles e positivos: desenvolvéronse dous módulos novos, o de votacións e o de enquisas; mellorouse o módulo de propostas; incorporáronse test unitarios para o control da calidade e seguridade da ferramenta; duplicouse a velocidade da plataforma e solucionáronse pequenos erros.

Ademais a participación neste programa supuxo un lanzamento de e-cidadania a nivel internacional, cunha acollida maior do esperada: por exemplo, en Macedonia están xa a empregar e-cidadania desde o tecido asociativo.

Chama a atención que os estudantes seguen a colaborar máis alá do remate das bolsas. O mesmo sucede con outras persoas que coñeceron e-cidadania grazas ao programa.

Esperamos poder compartir con vos a aplicación para finais de ano.

Podedes ver unha presentación do proxecto aquí

Estudo para as Bodegas Marqués de Vizhoja

|

Cidadania vén de rematar un estudo de satisfacción para unha recoñecida firma de viños. A investigación consistiu en avaliar a recepción dos seus produtos a través da campaña publicitaria realizada por esta empresa no conxunto da poboación galega. Analizouse a imaxe transmitida pola anuncios televisivos e o seu impacto na imaxe dos produtos.

O desenvolvemento do estudo contou coa implicación e participación de máis de 30 persoas a través de catro grupos focais desenvoltos nas cidades da Coruña, Ourense, Lugo e Vigo. No documento conclusivo do estudo recóllense as principais valoracións dos consumidores á hora de elixir esta marca.

Cidadania participa no Encontro Internacional Cooperativo

|

Cidadania participou no Encontro Internacional Cooperativo celebrado en Santiago baixo o lema “As empresas cooperativas axudan a construír un mundo mellor”. A través dun Stand na Mostra Cooperativa, tivemos ocasión de presentar os nosos servizos e identidade como cooperativa de traballo.

Durante os tres días do Encontro, cooperativistas de distintos países presentaron as súas experiencias en ámbitos como os servizos sociais, o consumo responsable, a banca ética ou o agro. As cooperativas e profesionais das administracións e doutros sectores tivemos ocasión de intercambiar experiencias e achegarnos a outras realidades.