Entradas

Nova edición formativa coas Mesas Locais de coordinación contra a violencia machista

|

Os concellos galegos participarán deste programa formativo promovido pola Dirección Xeral de Loita contra a violencia de xénero, desenvolvendo tres itinerarios que se adaptan aos distintos momentos nos que se atopan as Mesas Locais de Coordinación interinstitucional contra a violencia de xénero (MLC): formación para a constitución da MLC, para o seu impulso, ou para a elaboración de protocolos de actuación municipal.

Dos 313 concellos galegos, 162 contan cunha MLC propia ou mancomunada. O aumento na formalización destes espazos de coordinación é notable dende o ano 2016, onde só había espazos de coordinación formal no 20,4% dos concellos galegos. A antigüidade media das MLC constituídas é de arredor de 8 anos, e a súa composición rolda as 16 persoas, destacando a participación dos centros educativos, servizos sociais, Forzas e Corpos de Seguridade do Estado e Centros de información ás mulleres.

A mellora da coordinación institucional para fortalecer a atención ás vítimas recóllese na medida 78 do Eixo 2 do Pacto de Estado contra a violencia de xénero.

 

 

Nós temos formación en igualdade!

|

Un ano máis, o equipo de Cidadania S. Coop. galega participamos da formación organizada pola Unidade de Igualdade da Universidade de Vigo, a través do Itinerario Virtual de Xénero. Este programa formativo, que xa vai pola súa 12 edición, ofrece á comunidade universitaria e outras persoas con interese en formarse ou actualizarse nun abano de temáticas ben diversas para afondar no coñecemento e práctica da igualdade e loita contra a violencia de xénero.

As temáticas que se abordan abranguen dende aspectos introdutorios (perspectiva de xénero, economía, comunicación, educación, etc), ata cuentións englobadas na educación sexo-afectiva; ciencia, tecnoloxía e xénero; políticas de igualdade, e novas reflexións sobre o sexo/xénero.

Nesta edición, destacamos o curso “Novas leis para atallar as violencias machistas: medidas normativas do Pacto de Estado contra a violencia de xénero”, impartido por Marta García Mosquera, profesora titular de Dereito Penal da facultade de Ciencias Xurídicas e do Traballo. Cursar esta formación permitiunos refrescar normas xurídicas en relación á loita contra as violencias machistas, e ampliar os nosos coñecementos sobre actualizacións no ámbito xudicial, que mellorarán o noso quefacer profesional.

Así mesmo, recomendamos o Boletín de Igualdade, elaborado mensualmente pola Unidade de Igualdade e que sempre nos mantén informadas e onde atopamos recursos, persoas e novidades de interese. Compartimos a insignia de formación en igualdade:

 

Formación dirixida ao profesorado no marco do Globo

|

O Globo: observatorio para educar na cidadanía global consolídase como espazo para a promoción da participación social, despois de 5 anos de percorrido. As escolas e o profesorado son unha peza fundamental deste proxecto para a transformación social.

Neste inicio do 2024, O Globo desenvolve a terceira edición da formación “A educación para a cidadanía global como ferramenta socioeducativa”. Unha formación de 20 horas (homologables pola Consellería de Educación), con metodoloxías participativas e prácticas, e que orientarán ao profesorado a poñer en marcha experiencias de transformación social co seu alumnado.

As profesoras e os profesores con interese en participar na formación, poden atopar máis información aquí, e inscribirse a través deste enlace.

Animámosvos a participar neste espazo formativo onde xerar rede con outros compañeiros e compañeiras, e deixaros acompañar para ofrecer ao voso alumnado unha experiencia de participación para a transformación social da contorna.

Promovendo a educación para a cidadanía global da man do Globo

|

O Globo, proxecto promovido por Solidariedade Internacional de Galicia, continúa consolidándose como ferramenta para a promoción da cidadanía global entre a mocidade e o tecido asociativo galego. Xa son máis de 70 as microexperiencias de transformación social que forman parte deste Observatorio de participación, que mostra as iniciativas transformadoras do alumnado de centros educativos, entidades sociais, cooperativas e sociedade organizada para a mellora da súa contorna.

A promoción da igualdade de xénero, o coidado medioambiental, a saúde mental, ou o consumo responsable son algunhas das temáticas destacadas entre as microexperiencias de transformación social, que podes ver aquí.

O Globo tamén é unha Escola de participación, que desenvolve formacións arredor da cidadanía global, a participación, os liderados transformadores, e o intercambio de experiencias con referentes do Sur Global. Se formas parte do profesorado, podes inscribirte na formación programada para o 2024 sobre Educación para a cidadanía global como ferramenta socio-educativa, onde poñer en práctica co alumnado a metodoloxía luces – cámara e acción e promover a transformación social da súa contorna. Para mais información preme aquí.

O Sal do Mar: obradoiro de comunicación e liderado das mulleres do mar

|

O Sal do Mar é un programa promovido polo Grupo de Acción Local do sector Pesqueiro Ría de Arousa. O Sal do Mar ten como obxectivo dar a coñecer o programa de axudas do Fondo Europeo Marítimo, de Pesca e de Acuicultura (FEMPA), a través de obradoiros de formación e información arredor dos intereses das mulleres do mar. Neste obradoiro, a xerente do GALP compartiu coas asistentes as novidades do FEMPA e a Estratexia de Desenvolvemento Local Participativo.

Habilidades dixitais, saúde sexual e reprodutiva, economía circular, benestar psicolóxico ou dereitos laborais e asociacionismo foron algunhas das temáticas abordadas en anteriores edicións. A semana pasada celebramos un obradoiro arredor das habilidades para falar en público e os liderados transformadores e colectivos, no que bateeiras e mariscadoras puxeron en práctica pautas e estratexias para reforzar estas capacidades.

Se ben é certo que as mulleres nas profesións do mar son hoxe en día máis visibles e contan con maior recoñecemento social, todavía son unha minoría nos postos de representación das entidades das que forman parte.

O Sal do Mar

|

Este mes rematou o proxecto promovido polo GALP Ría de Arousa chamado “O Sal do Mar: avanzar compartindo“, coas mulleres do mar como protagonistas. Este proxecto de dinamización pretende achegar os fondos do FEMP ao colectivo de mulleres do sector pesqueiro, mediante a realización de xornadas e formacións en base aos seus intereses. Neste ano, realizáronse xornadas relacionadas coa comunicación das profesións do mar; dar a coñecer a profesión do marisqueo a flote e escoitar a voz de mulleres que se desenvolven nesta profesión ocupada maioritariamente por homes; falamos tamén sobre a economía circular e proxectos no territorio que coidan a sostibilidade do medio mariño; e por último puidemos desenvolver unha xornada sobre os dereitos sexuais e reprodutivos das mulleres.

Esta semana celebramos o Encontro de conclusións do proxecto de igualdade no mar, promovido polo Grupo de Acción Local do Sector Pesqueiro Ría de Arousa

|

A xornada contou coa benvida institucional da presidenta do GALP e patroa maior de Vilanova de Arousa, así como coa Concelleira de Igualdade do Concello de Boiro, e a intervención de Rosa Quintana, Conselleira do Mar. As conclusións e aprendizaxes ao longo destes meses foron compartidas polas propias mulleres participantes no proxecto, que tomaron a palabra no auditorio de Cabo de Cruz e foron as protagonistas do encontro. Falaron en público, proxectaron as vídeo – entrevistas previamente gravadas por elas mesmas, e fixeron preguntas e compartiron reflexións dende o público.   

O proxecto, que desenvolvemos dende Cidadanía como asistencia técnica, consistiu en tres partes: formativa (ferramentas para organizar e dinamizar reunións e xuntanzas en liña; liderado e estratexias para falar en público), informativa (organizamos xuntanzas con persoas expertas na saúde laboral das mulleres do mar, e en dereitos das profesionais do mar); e o propio encontro de conclusións, no que o obxectivo principal era que as mulleres tomasen a palabra e continúen gañando visibilidade.