Entradas

Acompañamos aos GALP galegos na difusión do período FEMPA

A Consellería do Mar publicou recentemente a convocatoria de axudas para proxectos ao abeiro das estratexias de desenvolvemento local participativo (EDLP), aprobadas aos grupos de acción local do sector pesqueiro (GALP) no marco do Fondo Europeo Marítimo, de Pesca e de Acuicultura 2021-2027.

Estas semanas acompañamos ao GALP Ría de Arousa nun Encontro Informativo que reuníu ás confrarías, concellos e asociacións da zona costeira. A xerencia do Grupo compartíu información de relevancia sobre a orde de axudas, e desenvolveuse unha Mesa Redonda con mulleres promotoras de proxectos financiados polo GALP: Cordelería R de Lorenzo, Algas La Patrona e Atando aparellos. Este evento enmarcouse no programa O Sal do Mar.

Ademais, percorremos a Costa Ártabra acompañando ao GALP Golfo Ártabro Norte. “Pescamos ideas” é a campaña de divulgación do programa de axudas do FEMPA, que pretende dinamizar ao sector pesqueiro e ao conxunto das entidades locais na promoción de proxectos. Durante o mes de novembro desenvolveranse, todas as semanas, xornadas locais de divulgación do FEMPA nesta zona costeira.

Acompañamos tamén ao GALP Costa Sostible na difusión do programa de axudas entre a poboación da Ría Muros – Noia, a través do seu programa Horizonte 2027. O GALP Costa Sostible incide particularmente no desenvolvemento sustentable do territorio. A través da visibilización de exemplos de éxito desenvoltos ao abeiro dos fondos FEMP, as persoas promotoras trasladan a súa experiencia a aquelas entidades con interese en emprender co apoio do GALP. Neste caso contouse coa experiencia de economía colaborativa Daqui Darredor, e o proxecto de turismo Mariñeiro por un día.

O prazo de presentación de proxectos finaliza o 26 de outubro. Para máis información, consulta a páxina web dos Grupos de Acción Local do Sector Pesqueiro.

Ciclo de Encontros Emprendedores da Axenda Urbana 2030 do Concello de Santiago

O Concello de Santiago, a través do CERSIA, desenvolveu o ciclo de Encontros Emprendedores, co obxectivo de difundir as liñas mestras da diagnose e o plan de acción da Axenda Urbana 2030. Estes encontros pretenden motivar o emprendemento de novas iniciativas mediante a posta en común de experiencias inspiradoras que xa están desenvolvendo a súa actividade empresarial no marco dos obxectivos de desenvolvemento sostible.

No verán contamos coa participación de Larlilás, asociación sen ánimo de lucro arredor da vivenda colaborativa na vellez. Este encontro xerou moito interese entre a cidadanía, e permitiunos repensar a vellez, o benestar e os coidados. Contamos ademais coa presenza de Iago Lestegás, Concelleiro de urbanismo, vivenda e cidade histórica, que compartiu algunhas claves sobre a vivenda e a calidade de vida no centro urbán.

Setembro foi o mes no que abordamos a temática Era Dixital, cristalizada en proxectos que empregan os medios telemáticos como unha parte importante o seu desenvolvemento. O Encontro Emprendedor reuniunos no espazo Creativas Galegas, arredor do proxecto El Camino ESS promovido por REAS Galicia. Esta iniciativa tece unha rede de proxectos de economía social e solidaria arredor do turismo alternativo, xerando un impacto positivo para o territorio e as persoas que habitan nel.

Esta semana celebramos o 9º Encontro Emprendedor, arredor do eixo temático Gobernanza. Coop57 Galiza, entidade referente e consolidada no territorio, achegounos ao seu funcionamento interno baixo os piares da participación, da democracia interna e da auto – organización. Ademais, puidemos aprender da súa actividade principal como instrumento financeiro ao servizo de proxectos transformadores no marco da economía social.

Se aínda non participaches, aínda estás a tempo! O último Encontro Emprendedor terá lugar no mes de novembro. Podes obter máis información sobre a Axenda Urbana 2030 na páxina web do Concello de Santiago.

Comezan os túnel dos viños das IXPs de Galicia

Os Grupos de Desenvolvemento Rural galegos desenvolven este proxecto de cooperación arredor da actividade das adegas galegas e a posta en valor da calidade dos viños que producen.

O mes de outubro desenvolveranse os túnel do viño, que consisten na celebración de catas sobre os viños vinculados ás Indicacións Xeográficas Protexidas, comentadas polo sumiller Martiño Santos Canosa, e dirixidas a persoas do sector da hostelería e ao público xeral. Así mesmo, celebraranse Masterclass da man de Luis e Alejandro Paadin.

Anota as datas!

Martes 10 de Outubro – Edificio da Deputación Provincial de Lugo (Lugo)
Luns 16 de Outubro – Centro Cultural Marcos Valcárcel (Ourense)
Luns 23 de Outubro – Espacio Muta (Vigo)
Luns 30 de Outubro – Aula de cata Paadín (A Coruña)

Podes inscribirte de balde no seguinte enlace.

O Sal do Mar: obradoiro de comunicación e liderado das mulleres do mar

O Sal do Mar é un programa promovido polo Grupo de Acción Local do sector Pesqueiro Ría de Arousa. O Sal do Mar ten como obxectivo dar a coñecer o programa de axudas do Fondo Europeo Marítimo, de Pesca e de Acuicultura (FEMPA), a través de obradoiros de formación e información arredor dos intereses das mulleres do mar. Neste obradoiro, a xerente do GALP compartiu coas asistentes as novidades do FEMPA e a Estratexia de Desenvolvemento Local Participativo.

Habilidades dixitais, saúde sexual e reprodutiva, economía circular, benestar psicolóxico ou dereitos laborais e asociacionismo foron algunhas das temáticas abordadas en anteriores edicións. A semana pasada celebramos un obradoiro arredor das habilidades para falar en público e os liderados transformadores e colectivos, no que bateeiras e mariscadoras puxeron en práctica pautas e estratexias para reforzar estas capacidades.

Se ben é certo que as mulleres nas profesións do mar son hoxe en día máis visibles e contan con maior recoñecemento social, todavía son unha minoría nos postos de representación das entidades das que forman parte.

A marca do territorio Costa da Morte – Terra Atlántica participa no Festiletras

Esta fin de semana celebrábase na Aldea do Couto a 41 edición do Festiletras, un encontro arredor da música, da artesanía, da gastronomía, da ciencia ou do cine, entre outras moitas actividades que se dan lugar na Costa da Morte esta fin de semana.

A marca do territorio Costa da Morte – Terra Atlántica formou parte do Festiletras, poñendo en valor os produtos da terra de cinco entidades socias da marca: Granxa Moreira, La despensa de lujo, Granxa Doreiro, Ramisquido e Verxel galego. O alumnado da Escola de hostelería Paseo das Pontes puxo en marcha a sus creatividade e os seus saberes para crear un menú con produtos de proximidade nesta demostración gastronómica.

Costa da Morte – Terra Atlántica é unha marca do territorio baixo a que se amparan distintas empresas e servizos co obxectivo de potenciar a identidade da Costa da Morte, en base ao reforzo e á distinción da produción local, baixo uns parámetros de calidade e valor diferencial. O Grupo de Desenvolvemento Rural Costa da Morte é o promotor desta marca.

#terraatlantica #territorio #desenvolvementolocal #rural #costadamorte #galicia #produtolocal #gastronomia #festiletras #GDR

A Aula Sostible do Freixo gaña o 2º premio á innovación do Ministerio de Agricultura, Pesca e Alimentación

Os premios de Excelencia á innovación para as mulleres rurais convócanse polo Ministerio de Agricultura, Pesca e Alimentación dende o ano 2010, co obxectivo de dar visibilidade á labor das mulleres rurais na diversificación da actividade económica e as súas actuacións emprendedoras nos seus territorios.

A Aula Sostible do Freixo conseguiu o 2º Premio na categoría da Excelencia á innovación na actividade pesqueira, onde se coopera entre varias entidades para transformar residuos plásticos procedentes da actividade pesqueira (e outros plásticos do ámbito doméstico) en ferramentas pesqueiras revalorizadas, constituíndo unha práctica de economía circular. Podes ler máis sobre o proxecto neste artigo.

A  Aula Sostible do Freixo tamén conta co recoñecemento da Consellería do Mar nos Premios de Economía Azul, na categoría Economía Circular. Moitos parabéns a Asociación de Mulleres do sector pesqueiro de Muros – Noia e ao Concello de Outes como promotores do proxecto, e ás entidades de inclusión social participantes (ADISBISMUR, A Creba e Asociación Misela), ao GALP Costa Sostible, e a todas aquelas persoas e entidades que senten este proxecto como seu: por moitos máis éxitos!

 

As IXPs dos viños galegos continúan medrando

Xa son 5 as comarcas incluídas nas Indicacións Xeográficas Protexidas dos viños galegos: Ribeiras do MorrazoBarbanza e IriaBetanzosVal do Miño-Ourense e a recentemente incorporada Terras do Navia. As IXPs do viño galego teñen o obxectivo de impulsar o sector vitivinícola, establecendo canles de comunicación e cooperación entre elas e, ao tempo, favorecer o coñecemento dos produtos que elaboran as adegas, así como dos recursos enoturísticos que os rodean.

A semana pasada reunímonos coas adegas participantes, os Grupos de Desenvolvemento Rural promotores da iniciativa, e AGACAL, para definir as accións a desenvolver despois do verán. Destacan a creación e posta en marcha da asociación de adegas das IXP de viños de Galicia, avanzar na mobilización ou recuperación da terra agraria para aumentar a base territorial das explotacións vitícolas, a creación de itinerarios enoturísticos nas IXP de Viños de Galicia ou a celebración de catas comentadas de viños das IXP de Galicia. Pronto poderemos contar máis!

Continúan os Encontros Emprendedores no marco da Axenda Urbana 2030 do Concello de Santiago

Ao longo do 2023, a través do CERSIA, estamos a desenvolver Encontros Emprendedores para difundir as liñas mestras da diagnose e o plan de acción da Axenda Urbana 2030. Estes encontros pretenden motivar o emprendemento de novas iniciativas mediante o coñecemento de experiencias inspiradoras que xa están desenvolvendo a súa actividade empresarial no marco dos obxectivos de desenvolvemento sostible.

En maio abordábamos a Economía Circular como oportunidade para o emprendemento, enfocándonos no textil e na moda da man de Off connection. Puidemos intercambiar ideas arredor dun modelo de produción e consumo máis sostibles, con ciclos produtivos máis longos, reaproveitando materiais xa producidos en desuso, e xerando unha menor cantidade de residuos.

Xuño foi o mes no que abordamos a Igualdade de Oportunidades, traendo a Promove: proxectos e persoas como experiencia marco. Neste Encontro Emprendedor establecemos unha conversa arredor do emprendemento das mulleres en Compostela, identificando fortalezas e obstáculos na posta en marcha de iniciativas empresariais, e poñendo en valor a economía social como modelo. Abordáronse tamén os valores destes emprendementos, onde as persoas están no centro, e tamén a confianza mútua, os coidados e as lóxicas colaborativas.

Xa inmersas no verán, a Economía Urbana foi o eixo do 6º Encontro Emprendedor. Neste espazo contamos coa iniciativa de Abastos 2.0, vinculando a importancia da oferta gastronómica co produto local. Da man de Iago Pazos puidemos achegarnos a esta experiencia de cociña de mercado, no mercado, que nos deixou con ganas de seguir saboreando estes Encontros!

O vindeiro Encontro Emprendedor terá lugar o día 22 de agosto, abordando a temática da Vivenda. Podes informarte sobre as iniciativas arredor da Axenda Urbana 2030 premendo aqui!

O Grupo de Desenvolvemento Rural de Pontevedra – Morrazo aproba a súa estratexia 2023 – 2027 para o período LEADER

O GDR Pontevedra – Morrazo aprobou en Asemblea Xeral a nova estratexía 2023 – 2027 para o período LEADER. Este proceso desenvolveuse de xeito participativo, resultando nun documento que se estrutura nun plan de acción, de formación, de cooperación e de dinamización territorial.

O programa de axudas céntrase no apoio aos sectores agrario e forestal, tendendo á diversificación, á dixitalización, á transición ecolóxica e á sostibilidade. Así mesmo, trátase de fomentar proxectos que melloren a calidade de vida e benestar social da poboación do rural, priorizando investimentos dirixidos á prestación de servizos que creen emprego e reduzan o risco de pobreza. O plan de acción vincúlase coa Lei de recuperación de terras agrarias de Galicia, orientada a novos aproveitamentos do territorio, así como co Bono Activa Rural.

Podes informarte máis polo miúdo na páxina web do GDR Pontevedra – Morrazo.

Publicados os resultados da enquisa á comunidade científica do CESGA

Cada ano o Centro de Supercomputación de Galicia avalía os resultados que derivan do uso do seu equipamento, permitindo coñecer o seu impacto na produción científica anual da comunidade usuaria.

Para recabar esta información deseñouse unha enquisa de produción científica que recolle a cantidade de publicacións e artigos publicados, asi como a participación en conferencias e congresos. Ademais, abórdase o impacto do uso dos equipamientos do CESGA nos proxectos presentados. A enquisa acadou unha participación de 727 persoas, un 83,3% do universo ao que nos diriximos. Ademais, púxose en marcha outra enquisa en paralelo, co obxectivo de coñecer a satisfacción coa experiencia da comunidade cientifica no uso dos equipamientos e mellorar os servizos tendo en conta as suxestións recibidas.

Podes consultar o informe sobre produción científica no 2022 na páxina web do CESGA.