Entradas

Nova edición das romarías a través da gastronomía!

|

A marca Costa da Morte, Terra Atlántica presentou a seguinte publicación para a promoción do produto local, a artesanía e a gastronomía propias do territorio, moitas veces plasmadas nos eventos comunitarios das romarías.

Desta ocasión, continúase percorrendo os concellos da Costa da Morte, cunha fonda identidade expresada a través de festas, espazos de celebración e de tradición cunha importante visión comunitaria.

Saber de aldea, a festa da familia, Santa Margarita, a festa do longueirón … e moitas outras! Son algunhas das celebracións postas en valor a través das fermosísimas ilustracións de Clara Copena. Ademais, o alumnado do IES Ramón Caamaño (a través da Escola de Cociña e Restauración) deseñou a proposta das receitas, que os animamos a probar en casa!

Podes descargar o documento premendo neste enlace.

O Concello de Avión aproba o protocolo contra a violencia de xénero

|

O Concello de Avión promove dende o ano 2021 a Mesa Local de Coordinación contra a violencia machista (MLC). Este espazo é participado polas áreas técnicas de Subdelegación de Goberno, DX de loita contra a violencia de xénero, Centro de saúde, Forzas e Corpos de Seguridade do Estado, Benestar Social, Educación, Emerxencias e Deportes, entre outros. Ten por obxectivo mellorar os mecanismos de coordinación técnica arredor das mulleres en situación de violencia machista e as súas fillas e fillos.

No marco da MLC, Cidadania acompañou a este equipo técnico na definición de obxectivos e a súa avaliación, así como na dinamización das reunións, lideradas polo Concello de Avión a través do Centro de información ás mulleres. Ao longo do 2025, desenvolvimos un proceso participativo arredor do Protocolo de coordinación inter-institucional contra a violencia machista no Concello de Avión.

Este documento, áxil e práctico, pretende dar a coñecer entre as persoas que integran a MLC os protocolos das demais áreas, e de afondar nos puntos de unión entre ámbitos para dar unha atención integral ás mulleres en situación de violencia. Arredor do 25N, Día Internacional da Eliminación da Violencia contra as Mulleres, o CIM presentou o documento nun acto público.

O Concello de Miño conclúe a formación no Espazo Gastronómico

|

A Concellería de Emprego do Concello de Miño organizou obradoiros de formación e capacitación para o emprendemento entre a veciñanza do Golfo Ártabro. O programa formativo xirou arredor das conservas e a transformación de produto pesqueiro e do agro, ao abeiro da norma técnica de Artesanía Alimentaria Galega.

Ao longo destes meses, a Casa do Pescador acolleu a un grupo de mulleres produtoras e emprendedoras que participou en distintos programas formativos. A formación tivo un carácter práctico, grazas ás posibilidades que brinda o equipamento municipal, que conta cunha cociña comunitaria. Os obradoiros contaron co liderado de Paula Patiño, do Laboratorio de arte culinario A Castrexa. Os itinerarios formativos xiraron arredor de:

  • Elaboracións artesanais en conserva de produto pesqueiro
  • Elaboracións de produto pesqueiro e horta en fresco
  • Novas formas de elaboración e transformación de produto pesqueiro e horta

Así mesmo, o grupo que participou na formación visitou a confraría de pescadores de Miño e Os Biosbardos, referentes en cultura de leira e produción artesanal de produtos do agro.

A formación permitiu xerar redes profesionais entre mulleres con traxectorias e profesións ben diversas, adquirir novos coñecementos e técnicas, e xerar ideas de emprendemento colectivo.

Atadeiras | A gobernanza das redeiras da Guarda

|

A Asociación de redeiras do Baixo Miño Atalaia pon en marcha o proxecto Atadeiras, que ten por obxectivo aumentar a súa gobernanza mediante o reforzo das capacidades persoais e as lóxicas asociativas.

Ao longo desta iniciativa formarémonos en habilidades de comunicación, sacaremos á luz a historia de vida da asociación tras 20 anos de traxectoria profesional, e aprenderemos sobre o modelo cooperativo e a súa aplicación á entidade.

Pretendemos, ademais, aumentar a visibilidade do colectivo, mediante vídeos e fotografías tomadas por Brais Lorenzo, e a xeración dunha páxina web deseñada por Marta Villar. Ademais, contaremos coa visión creativa de Amalia Puga para dotar á nave dunha identidade que transmita os valores do sector pesqueiro.

Atadeiras é posible grazas ao apoio do GALP Ría de Vigo – A Guarda, a través do FEMPA.

 

Conclúe Miranda, un futuro cara o mar en Cariño

|

A Asociación profesional de redeiras de Cariño desenvolveu un proxecto para poñer en valor os seus oficios entre a rapazada. Onte tivo lugar a xornada de posta en valor de resultados, onde as mulleres do mar e representantes institucionais compartiron os retos e os pasos de futuro para dar continuidade a esta iniciativa.

A xornada contou coa benvida de Ana López, alcaldesa do Concello de Cariño, e os parabéns de Ángeles Vázquez Suárez, Directora Xeral de Desenvolvemento Pesqueiro. Ademais, Rocio Fernandez, presidenta da Asociación, fixo un discurso emotivo e decidido sobre a importancia destas iniciativas para asegurar o futuro destas profesións feminizadas.

Animámosvos a seguirlles a pista, a visitar a nave das redeiras para coñecer este oficio tradicional, feminizado e artesanal. Non perdades a oportunidade se vivides na Mariña ou pasades as vacacións, xa que estaredes fortalecendo un sector fundamental para o mar.

A Xunta de Galicia fíxose eco desta xornada na súa nova “A Xunta destaca  o papel das mulleres no sector do mar e o seu liderado para afrontar os retos presentes e futuros da actividade pesqueira en Galicia”

Un venres no que coidar as redes!

|

Uns en Santiago, outras en Betanzos: o pasado venres, o equipo de Cidadania participamos en dúas xornadas de fortalecemento e xeración de redes cooperativas e relacionais, organizadas en Santiago por EspazoCoop e en Betanzos pola Escuela Juana Millán e 50pés Consultoras.

EspazoCoop | Ano internacional das cooperativas e Asemblea Xeral

A Unión de Cooperativas EspazoCoop desenvolveu na Cidade da Cultura este espazo no que dar conta dos traballos desenvoltos durante o 2024 e marcar as liñas mestras dos vindeiros anos. Recoñeceuse, ademais, a labor das cooperativas con máis de 20 anos. A ocasión culminou coa celebración do Ano internacional das cooperativas 2025 baixo o lema “Somos rede, somos impulso”, nunha xornada na que seguir tecendo rede co ecosistema cooperativo galego.

 

Escola itinerante Juana Millán | Escola de emprendedoras Juana Millán e 50pés consultoras

Betanzos acolleu este espazo para tecer redes entre mulleres emprendedoras, con empresas de nova creación e consolidadas, fortalecendo o ecosistema produtivo local. Os espazos de dinamización os conduciron 50pés consultoras e Alalá cooperativa. Despois de desfrutar dun xantar comunitario, puidemos camiñar o roteiro “Betanzos en femenino”, un percorrido histórico da impronta das mulleres na vida da cidade. E por se fose pouco, foi un espazo de encontro con mulleres ás que moito admiramos!

 

 

Nova edición formativa coas Mesas Locais de coordinación contra a violencia machista

|

Os concellos galegos participarán deste programa formativo promovido pola Dirección Xeral de Loita contra a violencia de xénero, desenvolvendo tres itinerarios que se adaptan aos distintos momentos nos que se atopan as Mesas Locais de Coordinación interinstitucional contra a violencia de xénero (MLC): formación para a constitución da MLC, para o seu impulso, ou para a elaboración de protocolos de actuación municipal.

Dos 313 concellos galegos, 162 contan cunha MLC propia ou mancomunada. O aumento na formalización destes espazos de coordinación é notable dende o ano 2016, onde só había espazos de coordinación formal no 20,4% dos concellos galegos. A antigüidade media das MLC constituídas é de arredor de 8 anos, e a súa composición rolda as 16 persoas, destacando a participación dos centros educativos, servizos sociais, Forzas e Corpos de Seguridade do Estado e Centros de información ás mulleres.

A mellora da coordinación institucional para fortalecer a atención ás vítimas recóllese na medida 78 do Eixo 2 do Pacto de Estado contra a violencia de xénero.

 

 

Celébrase unha sesión temática da Rede de Turismo Pesqueiro de España

|

O pasado xoves tivo lugar, na casa do Concello de Burela, unha sesión da Red de Turismo Pesquero de España organizada pola Fundación Expomar, que conta con financiamento europeo a través da Secretaría de Estado de Turismo.

En Burela deuse a coñecer a Rede á veciñanza, presentando a súa razón de ser e o seu funcionamento. Así mesmo, contouse con experiencias exitosas de pescaturismo e valorización do patrimonio cultural en Galicia.

Na zona da Mariña – Ortegal, Serxio Muíño Freire compartiu coas persoas asistentes a iniciativa Eufundevivo, que amosa Santo Andrés de Teixido poñendo en valor a autenticidade, a tradición e a historia do pobo investigando e interpretando distintos recursos do territorio. Ademais, Sauro Martínez compartiu a súa experiencia de pescaturismo Mariñeiro por un día!, onde as persoas poden acompañar aos profesionais do Playa de Sanxenxo nunha xornada de pesca artesanal na Ría de Pontevedra.

Despois, o Concello de Burela puxo en valor as actividades apoiadas para poñer en valor o patrimonio cultural e a actividade pesqueira que define a Burela como un dos cinco grandes portos galegos: o barco museo boniteiro, a ruta do mar e do barro, as festas patronais, e a propia gastronomía a partir do produto pesqueiro, son algúns dos recursos desta vila mariñeira.

Por último, a xornada rematou cunha proposta cultural arredor da música de raíz, con Xabier Blanco & Marina Ferradás, que amenizaron a xornada coa súa proposta musical acompañada duns petiscos pesqueiros e viños da terra.

 

Participamos en Consolida+, organizada por EspazoCoop

|

O pasado venres participamos xunto con Xeitura e Rexenerando nunha xornada na que reflexionamos e compartimos as traxectorias dos nosos proxectos cooperativos.

A xornada, organizada por EspazoCoop, tivo por obxectivo dar a coñecer o programa Consolida+, que consiste na prestación gratuita de asesoramento a cooperativas en funcionamento, para acompañalas no proceso de consolidarse no eido empresarial. A mesa redonda na que participamos estas tres cooperativas con certa traxectoria, permitíu poñer en común a importancia dos acompañamentos, os retos de futuro e a importancia da intercooperación, entre outras cuestións de relevancia.

Dende Cidadania agradecemos a EspazoCoop por contar con nós, Á Morada por acollernos no seu espazo, e a Xeitura e Rexenerando por compartir experiencias, e a Tako Cooperativa por plasmalo todo neste vídeo! https://www.instagram.com/p/DAbuGtlO6vG/

Estreáronse tamén vídeos de cooperativas consolidadas, elaborados por EspazoCoop: Árbore Consumo Consciente, Aventeira e Miraxe!  E por se fóra pouco, 50 pés foi tamén salientada coa boa práctica, compartindo coas persoas asistentes os seus proxectos estrela. Botádelle un ollo a todas estas iniciativas da economía social e solidaria!

Colaboramos co Concello de Burela nos proxectos Ondas Limpas e Burela Alumea

|

O Concello de Burela vén de recibir a resolución definitiva do FEMPA, xestionado mediante o programa de axudas do Grupo de Acción Local do Sector Pesqueiro A Mariña – Ortegal. O municipio burelense desenvolverá ao longo do 2024 e 2025 dous proxectos enmarcados na Estratexia de Desenvolvemento Local Participativa da zona costeira, onde o Grupo de Participación Adolescente da localidade terá un papel protagonista na posta en valor do patrimonio cultural mariñeiro e o coidado medio ambiental.

 

Burela Alumea | O espello do faro

Burela é un dos 5 portos pesqueiros máis importantes en Galicia. O seu faro, unha gran estrutura material e tamén simbólica forma parte da identidade da vila (cun espazo central no seu escudo), tivo que ser reparado despois dos fortes temporais do ano 2014. Para a súa reparación empregouse unha armazón metálica, que será reparada, e se convertirá no Espello do Faro, sobre o que xirarán as actividades de recuperación do patrimonio cultural material e inmaterial. A través de obradoiros de radio e fotografía, o grupo de participación adolescente compartirá experiencias coas asociacións locais do sector pesqueiro, recompilando contidos sobre a historia mariñeira da vila, que serán plasmados nunha obra artística sobre o espello do faro, que se convertirá nun novo punto de interese de Burela Bonita.

 

Ondas Limpas

O coidado do medio ambiente é tarefa de todos e todas. Neste programa de sensibilización – acción medioambiental, desenvolveranse diversas actividades nas que a mocidade burelá, as súas familias, as asociacións locais e o sector pesqueiro, pasarán á acción poñendo en marcha distintas propostas: xornadas de recollida de lixo e plásticos nos areais, elaboración dun mural artístico participativo empregando os refugallos recuperados, e o prato forte deste proxecto, a colaboración co Burela Club de Surf na práctica deste deporte, que leva no seu ADN o coidado (e o desfrute) da natureza. A contorna da Marosa será o escenario destas actividades, das que iremos informando!