Este ano Costa da Morte – Terra Atlántica sorprendeunos cunha proposta ben bonita e creativa, celebrando a xornada 8 Romarías!
Neste encontro elaboráronse 8 propostas gastronómicas vencelladas ás romarías da Costa da Morte, festas de grande tradición que forman parte do patrimonio inmaterial. Produtos do mar, do agro e da artesanía da Costa da Morte conversaron para elaborar e degustar os produtos desta zona, que destacan pola súa calidade.
A rede de colaboración entre entidades da Costa Sostible vai medrando!
Como ben sabedes, a Aula Sostible do Freixo consolídase na Ría de Muros-Noia como espazo de promoción da economía circular, onde asociacións de persoas con diversidade e mulleres do mar xuntan forzas e creatividade para converter plásticos dos areais e do noso día a día, en pezas de utilidade para o sector pesqueiro.
Neste 2024, co apoio do GALP Costa Sostible, nace a Aula Sostible dos Outeiriños no Concello de Muros…e xa estrearon actividades! A asociación de redeiras Illa da Estrela de Corme impartiu obradoiros de artesanía empregando redes de pesca, onde ADISBISMUR, a asociación de mulleres do mar Ría de Muros-Noia Costa Sostible, e MISELA, puxeron en marcha a súa creatividade para continuar fortalecendo a sostibilidade do entorno.
Un dos maiores retos aos que se enfronta o sector pesqueiro en Galicia é o do relevo xeracional. Vilas mariñeiras que creceron grazas á pesca, ao marisqueo, ao traballo nas conserveiras ou á reparación das redes de pesca…oficios que, no presente, perderon influencia económica e social. Nalgúns casos, estes oficios son grandes descoñecidos pola mocidade local, polo que mariscadoras e redeiras do Ortegal e da Costa da Morte están desenvolvendo obradoiros en institutos, nos que amosan o seu traballo. Queremos agradecer á mocidade a súa curiosidade e participación nos obradoiros!
Pero nas escolas do mar non só as mulleres amosan as súas profesións, senón que a rapazada indaga, a través de imaxes e obxectos, no seu entorno familiar e social, para atopar cales son os seus vínculos co mundo do mar: nasas dos portos, fotografías familiares antigas, carnets antigos de marisqueo, vellas agullas de redes…son algúns dos tesouros que xa atopamos! Que mais nos depararán as Escolas do mar?
O pasado venres participamos xunto con Xeitura e Rexenerando nunha xornada na que reflexionamos e compartimos as traxectorias dos nosos proxectos cooperativos.
A xornada, organizada por EspazoCoop, tivo por obxectivo dar a coñecer o programa Consolida+, que consiste na prestación gratuita de asesoramento a cooperativas en funcionamento, para acompañalas no proceso de consolidarse no eido empresarial. A mesa redonda na que participamos estas tres cooperativas con certa traxectoria, permitíu poñer en común a importancia dos acompañamentos, os retos de futuro e a importancia da intercooperación, entre outras cuestións de relevancia.
Dende Cidadania agradecemos a EspazoCoop por contar con nós, Á Morada por acollernos no seu espazo, e a Xeitura e Rexenerando por compartir experiencias, e a Tako Cooperativa por plasmalo todo neste vídeo! https://www.instagram.com/p/DAbuGtlO6vG/
Estreáronse tamén vídeos de cooperativas consolidadas, elaborados por EspazoCoop: Árbore Consumo Consciente, Aventeira e Miraxe! E por se fóra pouco, 50 pés foi tamén salientada coa boa práctica, compartindo coas persoas asistentes os seus proxectos estrela. Botádelle un ollo a todas estas iniciativas da economía social e solidaria!
Cidadanía Rede de Aplicacións Sociais, S. Coop. Galega.