Arranca Diversiplás: traballando dende a inclusión para unha Costa da Morte máis sostible

Coordinado pola asociación Íntegro, co apoio do GALP Costa da Morte e o financiamento do Fondo Social Europeo Marítimo e de Pesca e a Consellería do Mar da Xunta de Galicia, nace “#Diversiplás, + diverso – plástico”. Este proxecto ten como obxectivo a recuperación e a valorización de residuos plásticos derivados da actividade marisqueira e da pesca, e terá como protagonistas a diferentes colectivos e entidades da Costa da Morte. A través de Diversiplás darase un novo uso aos residuos plásticos, reutilizando este material para o deseño de pezas, promovendo a inclusión social de persoas con diversidade funcional e sensibilizando ao sector pesqueiro e á sociedade da necesidade de coidar o medio mariño.