#BurelaIN, un proxecto pola economía circular na Mariña

Esta semana presentáronse os resultados do proxecto #BurelaIN, unha iniciativa promovida polo Concello de Burela a raíz do proxecto Tanza. Neste territorio, as entidades de inclusión social, o sector pesqueiro, e asociacións ambientais uniron as súas forzas para desenvolver distintas actividades ao longo do 2021 e o 2022.

Entre as actividades principais destacaron os obradoiros de artesanía e innovación, onde os usuarios e as usuarias dos centros de inclusión deron unha segunda vida a refugallos do mar e aprenderon a tecer redes de pesca; realizáronse saídas de recollida de lixo nos areais de Celeiro, Burela e Ribadeo; elaborouse unha mostra itinerante para a sensibilización da poboación, e realizouse a obra mural “Burela, o mar e as súas xentes”, mediante o cal se acondicionou un espazo en desuso, representando ás mulleres do mar e reforzando a identidade mariñeira de Burela.