Entradas

Comeza Mariscadoras ConCiencia na Ría de Vigo

|

A Asociación Nacional de Mujeres de la Pesca (ANMUPESCA) da comezo a este proxecto co obxectivo de fortalecer as alianzas entre o marisqueo a pé e o ámbito científico – investigador.

O fondo da Ría de Vigo é un enclave importante en canto á extracción de bivalvos, se ben nos últimos anos os cambios globais no clima están afectando á supervivencia do produto pesqueiro e, por tanto, ao medio de vida de moitas persoas dedicadas ao marisqueo a pé, fundamentalmente mulleres.

Para adaptarse a esta situación, é fundamental tecer alianzas máis estreitas e procurar apoios noutros ámbitos, mais alá do propio sector do mar. Ao longo dos vindeiros meses percorreremos a liña de costa do fondo da Ría, visitando as zonas de extracción xunto con persoal científico – investigador, representantes dos concellos, entidades do mundo asociativo para o medio ambientais e o fomento da igualdade, e outras persoas con interese en comprender e achegar propostas para o coidado do medio mariño.

 

Visita ás zonas de extracción da Confraría de Redondela

Dende Chapela ata Cesantes, agradecemos as observacións e achegas de todas as persoas e entidades participantes: Confraría San Xoan de Redondela, asistencia técnica, concelleiras de medio ambiente e igualdade do Concello de Redondela, ADEGA, Future Ocean Lab da Universidade de Vigo, Xunta de Galicia co Axente de extensión pesqueira e bióloga de zona, GALP Ría de Vigo – A Guarda, e mariscadoras das confrarías de Redondela e Arcade.

As vindeiras actividades seguirán percorrendo as zonas de extracción do fondo da ría, que culminarán cunha visita á ECIMAT. Por último, celebrarase un foro no que concretar liñas de investigación que é preciso abordar para a supervivencia do marisqueo a pé como actividade, e estratexias para a transferencia entre saberes populares e científicos, para un mellor aproveitamento de coñecementos.

A Aula Sostible do Freixo acolle a visita de Circular Way to Inclusion

|

A Aula Sostible do Freixo xorde como un centro de transformación de lixo mariño consolidado arredor dun programa de actividades centradas na reutilización de refugallos mariños, dándolles unha segunda vida e deseñando novas pezas de utilidade para profesionais do sector pesqueiro. Este proxecto recibía no 2023 o segundo Premio de Excelencia a la Innovación para Mujeres Rurales que outorga o Ministerio de Agricultura, Pesca y Alimentación. A Aula Sostible do Freixo leva no seu ADN a colaboración, sendo promovido pola Asociación de Mulleres do Sector Pesqueiro SEO Fisterra-Ría Muros Noia, e participado por Misela, Adisbismur, A Creba Saúde Mental, e o Concello de Outes, contando co financiamento do GALP Costa Sostible.

Estes días recibiu a visita do proxecto europeo Circular Way to Inclusion, que trata de implicar á mocidade na promoción de proxectos de economía circular. As mariscadoras a pé de Muros amosaron o seu traballo no mar ás visitantes, dando a coñecer esta actividade pesqueira ás entidades socias de Circular Way to inclusion: a área de mocidade do Concello de Santiago, a Fundación PAIDEIA, Economía Circular Portugal e o Impact Hub Liepaja (Letonia).

Despois, unha andaina polo Muíño das Mareas, situado no Concello de Muros, levounos á Aula Sostible do Freixo, onde a familia do proxecto explicou a súa actividade ás participantes. A semana que vén acollerase á mocidade, polo que estade atentas ás redes da Aula Sostible!

Nove Mares chega a porto cos últimos espazos xeradores de cultura

|

Ao longo dos últimos meses a Costa da Morte acolleu os espazos xeradores de cultura, lugares para a reflexión e o intercambio arredor de distintas temáticas: as romarías, os deportes, os camiños e os oficios, deron paso á lingua e á despensa do mar. Estes espazos puxeron en valor iniciativas desenvoltas no territorio, que son referentes da Economía Azul, e deron pé a indagar de maneira colectiva sobre novas posibilidades para o desenvolvemento económico sostible da Costa da Morte.

 

A despensa do mar

A confraría de Laxe abría as súas portas para falar arredor dos produtos pesqueiros, unha das sinais de identidade da zona costeira. As poñencias correron a cargo de Xosé Regueira, vicepresidente de la Deputación da Coruña, que expuxo o proxecto Fogóns do Anllóns;Jorge Guitián, periodista, divulgador e crítico gastronómico, e Antonio Otín, do Forno de Guísamo, ben coñecido polas súas Empanadas do Mar. A Fundación Eduardo Pondal acolleu a segunda sesión, centrada na gastronomía local.

 

As artes do mar

O Museo Man de Camelle, espazo simbólico das artes do mar, acolleu este espazo xerador de cultura arredor das artes. Bernardino Martínez trazou un percorrido das representacións artísticas históricas na Costa da Morte, dando paso a Virginia Barros, que abordou distintas intervencións artísticas con material de refugallo de Mar de Fabula. Despois, Belem Tajes abordou o impacto da Costa da Morte na súa música, e tamén das súas recollas da música tradicional.

 

A língua

O Coído de Sabadelle, no concello de Vimianzo, foi o escenario onde se desenvolveu o último espazo xerador de cultura. Ademais do mar, o protagonismo foi para o poeta e narrador de Ponte do Porto Rafael Lema, e o empresario soneirán Ricardo Álvarez do proxecto «Auga de mar». O espazo natural deu lugar a sacar á luz a importancia deste enclave baleeiro, e tamén a desenvolver un obradoiro poético. Despois, o Castelo de Vimianzo abriu ás súas portas ás conclusións xerais extraídas dos espazos xeradores de cultura.

Pero os Nove Mares non rematan aquí! Segue as súas redes para ter información sobre as novidades.

Páxina web | Redes sociais

 

Nove mares: os Camiños do mar e os seus Oficios nos espazos xeradores de cultura

|

O mar é un potente motor económico, social e cultural. Na Costa da Morte a tripulación dos Nove Mares continúa reunindo iniciativas de economía azul de dentro e fora do territorio, divisando propostas replicables na zona costeira. As romarías do mar e os deportes do mar deron paso, nos meses de abril e maio, aos camiños do mar e aos oficios. Estas foron as temáticas de referencia baixo as que se organizaron os Espazos Xeradores de Cultura, onde abordamos o potencial de diversas iniciativas como elementos da economía azul sostible no territorio.

 

Camiños do mar

A Ruta dos Faros é un exemplo de como trazar unha ruta natural, singular e con contidos, que explica o territorio á vez que o constrúe. Na mesma xornada contamos tamén coa experiencia dos Concellos do Camiño Inglés, e as rutas do Xeoparque Cabo Ortegal. Os espazos de participación arredor dos camiños do mar permitiron reflexionar e coñecer actividades e iniciativas complementarias aos propios trazados, como a recuperación da toponimia local, a educación ambiental ou a ornitoloxía.

 

Oficios do mar

A carpintería de ribeira levounos ata o estaleiro O Baladiño, espazo singular que transmite a cultura do mar a través deste oficio tradicional. Nun novo Espazo Xerador de Cultura coñecemos iniciativas de turismo mariñeiro promovidas conxuntamente entre entidades locais e mariscadoras, no Concello da Pobra do Camariñal, a restauración do estaleiro San Ciprián de Outes convertido en espazo museístico, e a importancia do traballo das mulleres do mar, pioneiras en moitas ocasións da diversificación da actividade produtiva a través da economía azul. Coñecimos, tamén, as liñas mestras do Plan de Cultura Marítima da man do seu coordinador, Oscar Fuertes.

A singradura continúa coa Despensa do Mar e as Artes do Mar. Se non queres perderte nada, ségue a Nove Mares nas redes sociais e na súa páxina web!

 

A singradura dos Nove Mares aborda a cultura marítima na Costa da Morte

|

A iniciativa Nove Mares daba comezo este mes aos Espazos Xeradores de Cultura. Estes encontros públicos abordan distintas temáticas vencelladas coa cultura do mar, achegando ao territorio iniciativas de referencia que inspiran a coñecer boas prácticas, e identificar potencialidades para o fomento da economía azul na Costa da Morte.

 

Romarías do Mar

A comezos de marzo visitábamos Caión para abordar as Romarías do Mar: festas comunitarias, espirituais e gastronómicas, tradicións que fortalecen a identidade da Costa da Morte. A celebración da Virxe do Carme, a Danza de Arcos, ou a recuperación do “Eu fun de vivo” (traspasando o territorio da Costa da Morte), forman parte da cultura mariñeira do territorio costeiro. Manuel Vilar, director do Museo do Pobo galego, e Mavi Lezcano, investigadora a docente da USC, achegáronnos claves sobre a importancia das Romarías do mar. As persoas asistentes achegaron novas ideas á organización e celebración destas expresións culturais. Podes ler as conclusións na Lonxa dos Nove Mares.

 

Deportes do mar

Non cabe dúbida que o deporte é un motor de desenvolvemento social e económico: o surf, o mergullo, o boulder, as travesías a nado, o kite surf e a vela, entre outros moitos deportes do mar, fortalecen a nosa vinculación co medio mariño e a paisaxe, a través da diversión, do ocio, e da experiencia vivencial. En Razo (Carballo), contamos coa presenza de Alfonso Villares, Conselleiro do Mar, e Xosé Regueira, vicepresidente da Deputación da Coruña, que puxeron en valor a importancia da Cultura Marítima e iniciativas cooperativas como a Rede de Pobos do Surf. Ademais, presentouse como boa práctica Malpica One Surf Academy, unha iniciativa desenvolta hai xa 20 anos por dous surfistas apaixoados por este deporte. Este sábado 16 de marzo, ás 11h, reunirémonos na Aldea do Couto para extraer conclusións, abrindo o foco a outras prácticas deportivas e afondando nas potencialidades de dinamización do territorio.

Se non queres perderte nada, segue as redes sociais de Nove Mares, e a información da súa páxina web. Nas vindeiras semanas abordaremos os Camiños do Mar, a Despensa do Mar, as Artes do Mar e a Língua do Mar. Nove Mares | A Cultura do Mar na Costa da Morte

Comeza Nove Mares: a cultura do mar na Costa da Morte

|

Esta semana presentouse aos medios de comunicación o proxecto Nove Mares: a cultura marítima da Costa da Morte, promovido pola Fundación Eduardo Pondal. Esta iniciativa, que promoverá espazos participativos ao longo de 9 concellos da liña costeira, indagará sobre a relevancia da cultura mariñeira para o territorio, como un dos principais motores de identidade diferencial e desenvolvemento socio económico da Costa da Morte. O final do proxecto construirá un arquivo colectivo de potencialidades e iniciativas culturais xeradoras de desenvolvemento socio económico na zona.

Nove Mares inicia o seu percorrido cunha serie de entrevistas ás principais referencias culturais, económicas e sociais do territorio, para nutrir de contidos os Encontros Xeradores de Cultura, nos que contaremos con referentes inviduais e colectivos arredor das seguintes temáticas:

As romerías do mar
Os camiños do mar
A carpintería de ribeira
Os deportes do mar
As recetas do mar
As artes do mar

Convidámosche a botar un ollo na páxina web e redes sociais do proxecto para estar ao tanto as actualizacións.

Acompañamos aos GALP galegos na difusión do período FEMPA

|

A Consellería do Mar publicou recentemente a convocatoria de axudas para proxectos ao abeiro das estratexias de desenvolvemento local participativo (EDLP), aprobadas aos grupos de acción local do sector pesqueiro (GALP) no marco do Fondo Europeo Marítimo, de Pesca e de Acuicultura 2021-2027.

Estas semanas acompañamos ao GALP Ría de Arousa nun Encontro Informativo que reuníu ás confrarías, concellos e asociacións da zona costeira. A xerencia do Grupo compartíu información de relevancia sobre a orde de axudas, e desenvolveuse unha Mesa Redonda con mulleres promotoras de proxectos financiados polo GALP: Cordelería R de Lorenzo, Algas La Patrona e Atando aparellos. Este evento enmarcouse no programa O Sal do Mar.

Ademais, percorremos a Costa Ártabra acompañando ao GALP Golfo Ártabro Norte. “Pescamos ideas” é a campaña de divulgación do programa de axudas do FEMPA, que pretende dinamizar ao sector pesqueiro e ao conxunto das entidades locais na promoción de proxectos. Durante o mes de novembro desenvolveranse, todas as semanas, xornadas locais de divulgación do FEMPA nesta zona costeira.

Acompañamos tamén ao GALP Costa Sostible na difusión do programa de axudas entre a poboación da Ría Muros – Noia, a través do seu programa Horizonte 2027. O GALP Costa Sostible incide particularmente no desenvolvemento sustentable do territorio. A través da visibilización de exemplos de éxito desenvoltos ao abeiro dos fondos FEMP, as persoas promotoras trasladan a súa experiencia a aquelas entidades con interese en emprender co apoio do GALP. Neste caso contouse coa experiencia de economía colaborativa Daqui Darredor, e o proxecto de turismo Mariñeiro por un día.

O prazo de presentación de proxectos finaliza o 26 de outubro. Para máis información, consulta a páxina web dos Grupos de Acción Local do Sector Pesqueiro.

O Sal do Mar: obradoiro de comunicación e liderado das mulleres do mar

|

O Sal do Mar é un programa promovido polo Grupo de Acción Local do sector Pesqueiro Ría de Arousa. O Sal do Mar ten como obxectivo dar a coñecer o programa de axudas do Fondo Europeo Marítimo, de Pesca e de Acuicultura (FEMPA), a través de obradoiros de formación e información arredor dos intereses das mulleres do mar. Neste obradoiro, a xerente do GALP compartiu coas asistentes as novidades do FEMPA e a Estratexia de Desenvolvemento Local Participativo.

Habilidades dixitais, saúde sexual e reprodutiva, economía circular, benestar psicolóxico ou dereitos laborais e asociacionismo foron algunhas das temáticas abordadas en anteriores edicións. A semana pasada celebramos un obradoiro arredor das habilidades para falar en público e os liderados transformadores e colectivos, no que bateeiras e mariscadoras puxeron en práctica pautas e estratexias para reforzar estas capacidades.

Se ben é certo que as mulleres nas profesións do mar son hoxe en día máis visibles e contan con maior recoñecemento social, todavía son unha minoría nos postos de representación das entidades das que forman parte.

Acompañamos aos GALP na elaboración das estratexias de desenvolvemento local participativo

|

Os Grupos de Acción Local do Sector Pesqueiro galegos atópanse no proceso de elaboración das Estratexias de Desenvolvemento Local Participativo para o período de programación 2023-2027 do Fondo Europeo Marítimo, da Pesca e da Acuicultura (FEMPA).

Durante o verán levaranse a cabo encontros presenciais e virtuais, nos que se perfilará unha diagnose sobre as necesidades de cada un dos territorios costeiros. A segunda fase deste proceso permitirá deseñar un Plan de acción en cada territorio, de forma participada entre o sector pesqueiro, público, social e económico.

As Estratexias de Desenvolvemento Local Participativo orientarán a aplicación do Fondo Europeo Marítimo e da Pesca e da Acuicultura (FEMPA) para o período de fondos europeos 2021-2027.

Para máis información sobre o proceso en cada territorio:

GALP A Mariña Ortegal

GALP Golfo Ártabro Norte

GALP Golfo Ártabro Sur

GALP Ría de Arousa

GALP Ría de Pontevedra

O Sal do Mar conclúe nun encontro de asociacións de mulleres do mar

|

A semana pasada celebrábamos o final do programa O Sal do Mar, un proxecto de animación promovido polo Grupo de Acción Local do sector pesqueiro Ría de Arousa, para a promoción da igualdade de xénero no sector. Este encontro de mulleres do mar puxo en valor o asociacionismo do sector, os avances conseguidos nos últimos anos e tamén a importancia de compartir para avanzar xuntas. A Direción Xeral de Desenvolvemento Pesqueiro recoñeceu a labor do GALP en canto á visibilización das mulleres do mar, mentres que a xerente do GALP Ría de Arousa relatou as accións desenvoltas ao longo do período FEMP para o impulso das mulleres do sector.

A parte central da xornada desenvolveuse nunha Mesa Redonda na que asociacións de mulleres do mar tomaron a palabra: ANMUPESCA, Mulleres Salgadas e O Peirao, Federación galega de redeiras artesás, compartiron a súa experiencia asociativa e abordaron o momento actual no que se atopan as tres entidades. Ademais, debateuse sobre os acordos finais acadados no 7º Congreso Nacional de la Red Española de Mujeres en el Sector Pesquero, e sobre as actividades desenvoltas polas entidades ao longo destes últimos anos.